Turistët e uritur që ecin në Murin e Madh të Kinës tani mund ta marrin drekën nga ajri. Gjigandi kinez i shpërndarjes së ushqimit Meituan njoftoi javën e kaluar se do të përdorë dron për të shpërndarë ushqime, pije dhe mallra të tjera si furnizime mjekësore për klientët në Murin e Madh të Kinës afër Pekinit.
Është dërgesa e parë me dron në kryeqytetin e prodhuesit dhe eksportuesit më të madh në botë të mjeteve ajrore pa pilot për përdorim civil.
“Duke përdorur dronët, ne mund të bëjmë udhëtime që zgjasin 50 minuta në këmbë në pesë minuta dhe t’u dërgojmë vizitorëve artikuj që mund ta bëjnë më të lehtë për ta përballimin e nxehtësisë së lartë dhe furnizimet e urgjencës,” tha drejtori i Meituan, Yan Yanu për televizionin shtetëror CCTV.
50 cent për dorëzim
Dronët mund të fluturojnë në erë dhe shi të moderuar dhe të mbajnë deri në 2.3 kilogramë, njoftoi kompania.
Tarifa për dërgesën me dron është vetëm 4 juanë (0,50 euro), e njëjtë me dërgesat e rregullta. Shërbimi pranon porosi nga ora 10:00 deri në orën 16:00, pas së cilës dronët do të transportojnë mbeturina në stacionet e riciklimit, thuhet në njoftimin për shtyp.
Por dronët ende kanë nevojë për ndihmë njerëzore. Pas marrjes së porosisë, një punëtor i Meituan do ta marrë atë nga një dyqan aty pranë dhe do ta sjellë në çatinë e hotelit, ku do të peshohet dhe paketohet. Operatori më pas i bashkon paketën dronit, i cili do të fluturojë me autopilot në pjesën e Murit të Madh të Kinës ku ndodhet kulla e rojes. Një tjetër punëtor do të presë dërgesën atje. Përdoruesit e aplikacionit më pas mund të marrin paketën e tyre nga një punonjës i kullës së rojeve.
Dronët në qytete kanë dorëzuar tashmë 300,000 porosi
Shërbimet e dërgesës me drone janë zgjeruar me shpejtësi në Kinë vitet e fundit. Dronët po përdoren gjithnjë e më shumë për të shpërndarë me shpejtësi sende ushqimore te klientët që jetojnë në metropolet kineze, shkruan CNN.
Meituan bëri dorëzimin e parë me dron në vitin 2021 dhe deri më tani dronët kanë dorëzuar më shumë se 300,000 porosi në qytete.
Për të naviguar në hapësirat e dendura urbane, dronët ndjekin rrugë të paracaktuara nga vendet e nisjes – zakonisht çatitë – deri në pikat e ngritjes. Në vend që të qëndrojnë pezull para dritares së një apartamenti apo zyre, dërgesat lihen në kioska pranë ndërtesave rezidenciale dhe tregtare, ku klientët mund të marrin porositë e tyre.
Që nga viti i kaluar, Meituan ka ngritur gjithashtu kioska dërgese me dron në parqet publike në Shangai dhe Shenzhen.
