Azdren Shala nga PSD-ja ka shprehur kritika të ashpra ndaj mënyrës se si çështja e Astrit Deharit po trajtohet nga Lëvizja Vetëvendosje dhe qeveria aktuale. Shala ka theksuar se kjo çështje është instrumentalizuar për përfitime politike, ndërsa drejtësia e premtuar për Astritin nuk është realizuar as pas katër viteve në pushtet.
Ai ka rikujtuar një deklaratë të kryeministrit Albin Kurti më 12 nëntor 2016, kur gjatë një proteste në Prizren, Kurti kishte thënë se “Shyqyr që vdiq Astriti e po rritemi,” duke e cilësuar këtë si dëshmi të qartë të qasjes së LVV-së ndaj rastit.
Shala gjithashtu ka ngritur pikëpyetje mbi mënyrën se si janë trajtuar mostrat e Astrit Deharit dhe ka vënë në dukje kontradiktat në qëndrimet e Vetëvendosjes në lidhje me to, duke akuzuar partinë në pushtet për manipulim dhe mungesë vullneti për zbardhjen e plotë të rastit. Sipas tij, mospranimi i një superekspertize të pavarur nga ana e familjes dhe Vetëvendosjes tregon qartë se epilogu përfundimtar nuk i leverdis partisë në pushtet, e cila e mban çështjen pezull për përfitime politike.
Në fund, Shala thekson se kufijtë e marrëzisë politike janë shumë të gjera dhe se qytetarët duhet të reflektojnë mbi këtë situatë. /Kosovatimes/
