“Artistët për Artistë” dhe organizata “Shqiptaria”, në bashkëpunim kanë hapur një ekspozitë të veçantë për nder të ditëlindjes së Shenjtores Nëna Terezë.
Ekspozita u organizua në sheshin “Nënë Tereza”, në Prishtinë, dhe përmban vepra të artistëve vendorë dhe të rajonit të cilët kanë shfaqur figurën e Nënë Terezës përmes artit të tyre.
“Për nder të shenjtores tonë Gonxhe Bojagjiu-Nëna Terezë. Ne e kemi shënuar edhe më herët, por tash kemi filluar ta bëjmë si tradicionale te përmendorja e Nënës Terezë, për të qenë afër qytetarëve, për ta kujtuar ditëlindjen e Nanë Terezës”, tha Veton Gusia, organizator.
“Ne kemi vendosur bashkë me ‘Shoqatën Artistët për Artistët’, që një figurë madhështore, si shenjtorja Nëna Terezë, ta përjetësojmë përmes artit pamor, përmes pikturës, e cila do të thotë këtë trashëgimi që ka lënë ajo t’ua lëmë brezave të tjerë”, tha Basri Beka, OJQ Shqiptaria.
Kjo ekspozitë do të jetë vjetore dhe do të hapet gjithnjë në sheshin Nëna Terezë që të jetë pranë qytetarëve për ta përjetuar dhe kujtuar ditëlindjen e Nënë Terezës.
