Dy drejtuesit e institucioneve menaxhuese të burgjeve të Kosovës e Shqipërisë janë takuar për të diskutuar për praktikat më të mira në menaxhim e deri te ndihmat e ndërsjella.
Drejtori i Përgjithshëm i Shërbimit Korrektues të Kosovës (ShKK), Ismail Dibrani, ka takuar drejtorin e Burgjeve të Shqipërisë, Klevis Qose, Këshilltarin Global të ICITAP-it për Kundërterrorizëm, Bill Sage, dhe Këshilltarin Rajonal për Njësitë e Inteligjencës Korrektuese, Frank Karam.
“Të mbështetur nga ICITAP-i, tashmë janë identifikuar pajisje të nevojshme që do të sigurohen për ShKK-në, si: skanerë, kamera detektuese të telefonave, si dhe shumë pajisje të tjera të sigurisë, të cilat do të vijnë në Kosovë gjatë muajit tetor”, njofton ShKK.
Mbështetja e ICITAP-it u vlerësua lart nga të dyja institucionet, veçanërisht për themelimin e Njësisë së Inteligjencës Korrektuese të Shërbimit Korrektues të Kosovës. Sipas njoftimit të ShKK-së, kjo njësi ka arritur të rrisë nivelin e sigurisë, duke u bërë model i mirë për rajonin. /Kosovatimes/
