Kryetari i Aleancës për Ardhmërinë e Kosovës (AAK), Ramush Haradinaj, ka reaguar ashpër ndaj vendimit të Qeverisë së Vetëvendosjes për të rritur pagën minimale në 350 euro, duke e quajtur këtë veprim një poshtërim për qytetarët.
Sipas Haradinajt, paga minimale duhet të ishte 450 euro dhe të arrinte së paku 500 euro në ditën e parë të një qeverie të re, me rritje vjetore bazuar në zhvillimin ekonomik dhe inflacionin.
Ai kritikoi qeverinë aktuale, duke thënë se për katër vite është vonuar me rritje pagash dhe pagën minimale e konsideron më shumë si ndihmë sociale sesa si një pagë të denjë për punëtorët.
Haradinaj theksoi se vendet e rajonit e kanë kaluar prej kohësh pragun e pagës minimale prej 500 eurosh, duke akuzuar kryeministrin për mashtrime në prag të zgjedhjeve. /Kosovatimes/
