Deputetja Hykmete Bajrami ka reaguar ashpër ndaj deklaratave të Kryeministrit Albin Kurti për “lulëzimin e punësimit” në vend. Bajrami e ka kritikuar Kryeministrin, duke thënë se rritja ekonomike e ulët dhe deficiti tregtar nuk mund të çojnë në krijimin e vendeve të shumta të punës, siç pretendon ai.
“Rritja ekonomike prej 4.3% në 2022, 3.3% në 2023 dhe maksimumi 3.9% e pritshme për 2024, nuk është bazë për punësim masiv. Deficiti tregtar prej 4.9 miliardë eurosh tregon të kundërtën,” theksoi Bajrami.
Ajo gjithashtu shtoi se investimet kapitale dhe private gjatë mandatit të Kurtit kanë qenë të ulëta, duke vënë në dyshim efektivitetin e politikave ekonomike të qeverisë.
Bajrami kritikoi përdorimin e statistikave të ATK-së për të promovuar uljen e papunësisë, duke theksuar se të dhënat e Trust-it tregojnë një situatë më reale të punësimit, me rritje modeste të vendeve të punës ndër vite.
“Papunësia është ulur jo pse ka lulëzuar ekonomia, por sepse fuqia punëtore po largohet nga Kosova,” përfundoi ajo. /Kosovatimes/
