Një grup nacionalist serb me mbi 6400 anëtarë në rrjetin social “Telegram” ka paralajmëruar bllokimin e të gjitha pikave kufitare midis Serbisë dhe Kosovës më 6 shtator. Kjo lëvizje vjen si përgjigje ndaj mbylljes së pesë komunave ilegale serbe në veri të Kosovës nga Policia e Kosovës, një veprim që ka tensionuar më tej situatën në rajon.
Grupi i quajtur “Korridor” po bën thirrje për mobilizim masiv të qytetarëve serbë për të bllokuar pikat kufitare si Bërnjaku, Jarinja, Merdarja, Dheu i Bardhë dhe Kulla. Organizatorët kanë njoftuar se do të ofrojnë transport nga disa qytete të Serbisë, përfshirë Beogradin, Novi Sadin, Smederevën, Kragujevacin, Nishin, Krushevcin, Vranjën dhe Rashkën, për të lehtësuar pjesëmarrjen në këtë aksion.
Në komunikatën e tyre, ata theksojnë se aksionet do të vazhdojnë derisa, sipas tyre, të arrihet “largimi përfundimtar i terroristëve të Kurtit nga veriu i Kosovës”. Grupi “Korridor” është aktiv prej kohësh në shpërndarjen e materialeve propaganduese dhe nxitëse kundër Kosovës, duke përhapur dezinformata dhe nxitje për veprime të dhunshme në rajon. /Kosova.info/
