Portali në gjuhën serbe “Kossev” ka publikuar një intervistë me ambasadorin e Mbretërisë së Bashkuar në Kosovë, Jonathan Hargreaves, ku ai shprehet se Kosova ka një vizion të qartë për të qenë një shtet modern, demokratik, multietnik dhe evropian. Hargreaves theksoi mbështetjen e Mbretërisë së Bashkuar për promovimin e paqes dhe stabilitetit në rajon, por nënvizoi se kjo nuk mund të arrihet pa zbatimin e plotë të Marrëveshjes Bazike dhe Marrëveshjes së Ohrit nga të dyja palët, Kosova dhe Serbia.
Ai kritikoi qeverinë për vendimet e saj të pakoordinuara për ndalimin e dinarit dhe mbylljen e degëve të Postës Serbe dhe Bankës së Kursimeve, duke bërë thirrje për konsultime më të gjera me komunitetet lokale dhe bashkësinë ndërkombëtare. Nga ana tjetër, ambasadori përshëndeti disa politika të suksesshme të qeverisë së Kosovës, si zgjidhja e faturimit të rrymës, implementimi i marrëveshjes për targat dhe konvertimi i patentë shoferëve.
Hargreaves gjithashtu nënvizoi rëndësinë e mbajtjes përgjegjës për sulmin në Banjskë të Millan Radojiçiqit dhe të përfshirëve të tjerë. Në pyetjet lidhur me vizitën e shefit të CIA-s, William Burns, ai theksoi se përkushtimi i ShBA-së për sigurinë dhe stabilitetin në Kosovë dhe Ballkanin Perëndimor mbetet i pandryshuar.
Ambasadori britanik theksoi pasigurinë e popullatës serbe në veri të Kosovës, duke shtuar se këta qytetarë shpesh ndihen të papërfaqësuar nga autoritetet në Prishtinë dhe Beograd. Ai shprehu keqardhje për bojkotin e përfaqësimit demokratik nga serbët e Kosovës, i udhëhequr nga Lista Serbe, në peticionin për shkarkimin e kryetarëve shqiptarë në veri. /Kosovatimes/
