Presidentja Voja Osmani ka uruar nxënësit, prindërit dhe mësimdhënësit me rastin e fillimit të vitit të ri shkollor, duke e përshkruar këtë ditë si të veçantë jo vetëm për nxënësit, por edhe për prindërit dhe mësuesit.
Ajo vlerësoi se atmosfera e ngrohtë dhe energjia që mbizotëron në oborret e shkollave përkujton rëndësinë e shkollës si vendi ku formësohen ëndrrat, zhvillohen talentet dhe ndërtohen themelet e së ardhmes.
Osmani theksoi se suksesi në arsim kërkon përkushtim të përbashkët për krijimin e një mjedisi të sigurt dhe mbështetës për nxënësit dhe mësimdhënësit.
Ajo inkurajoi nxënësit të shfrytëzojnë mundësitë dhe ëndrrat e reja, ndërsa mësuesve u kërkoi të vazhdojnë të frymëzojnë me pasion dhe përkushtim.
Presidentja uroi që ky vit të jetë i mbushur me suksese dhe mësime të vlefshme për të gjithë./Kosovatimes/
