Në nderim të jetës saj dhe veprës humanitare, Nënës Terezë, janë emëruar sheshe, janë ndërtuar buste e shtatore. Në 27 vjetorin e vdekjes, dy mjekë nga Gjakova kujtojnë kohën kur ideuan ndërtimin e shtatores së parë të Nënë Terezës më 15 prill 1990 në vendlindjen e nënës së saj, Dranes, në Novosellë të Gjakovës gjatë tubimit për pajtimin e gjaqeve.
Engjëll Lleshi dhe Haxhi Kamberi, studentë e ish-aktivistë, i ruajnë të freskëta momentet kur kishin ideuar ndërtimin e shtatores së Nënë Terezës. Tash, dr. Kamberi thotë se në atë kohë shumë të vështirë, çështja e Kosovës po merrte drejtim të ri.
“Rinia e fshatit Novosellë erdhi deri te përfundimi që këtu të ngritët një shtatore Nënës Terezë, është pikërisht kjo shtatore afër vendit ku është mbajtur tubimi, sepse Nënë Tereza ishte fituese e çmimit Nobel, ishte shqiptare, ishte ajo që promovonte vlerat e kombit tonë në mbarë botën dhe njohje nga tërë bota ndërsa ne ishim ata që po i tregonim botës se vlera të tilla nuk kanë lindur rastësisht te Nëna Terezë por janë vlera të mbarë popullit shqiptar të cilat i ka kultivuar dhe i ka ruajtur në shekuj”, tha Haxhi Kamberi.
Në anien tjetër kolegu i tij, Engjëll Lleshi thotë pas idesë, menjëherë filloi puna për ndërtimin e shtatores.
“Edhe pse atëherë ishte gjallë ishte 80 vjetori i lindjes së saj e dhamë si ide ngritjen e shtatores që të mbetet e pavdekshme në një mënyrë të shkrihet në bronz. E dhashë këtë ide pastaj filluam organizimin për përgatitjeje rreth kësaj shtatore. është busti i parë që është ngritë në krejt botë. Kam dëgjuar se është bërë zhurmë sikurse edhe për prejardhjen e saj, edhe për shtatore kam dëgjuar se në Kroaci kanë thanë se ata janë para nesh por jo, kjo është shtatorja e parë që është punuar në vitin 1990”, tha Lleshi.
Ai po ashtu thotë se pjesa më e vështirë ishte bartja e shtatores nga Shkupi në Novosellë, ku bartësit e këtij misioni, Lekë Leka dhe Mark Tanushi, ishin rrahur dhe maltretuar edhe fizikisht nga policia serbe.
