Prokuroria Speciale e Kosovës ka ngritur aktakuzë për sulmin e 24 shtatorit në Banjskë, ku mbeti i vrarë polici Afrim Bunjaku. Aktakuza u ngrit rreth një vit pas sulmit në Banjskë.
Njohësi i çështjeve të sigurisë, Fatmir Çollaku, tha se përkundër zgjatjes së afateve për ngritjen e aktakuzës, Prokuroria Speciale e Kosovës ka bërë një punë të mirë dhe është për të përshëndetur ngritja e aktakuzës për sulmin terrorist në Banjskë.
Ai në InfoPlus në RTK deklaroi se së më mirë të punohet në mënyrë graduale dhe epilogu të jetë i drejtë. Sipas tij, veprat që janë kryer në sulmin terrorist të Banjskës kualifikohen si vepra penale të terrorizmit “Kjo vepër i përmbush të gjitha elementet e veprës penale terroriste”, theksoi Çollaku.
Ndryshe Kryeprokurori i Prokurorisë Speciale, Blerim Isufaj, tha sot se aktakuza është ngritur ndaj 45 personave. “Prokuroria Speciale ka punuar intensivisht duke zhvilluar hetime në këtë rast shumë kompleks. Pas grumbullimit të gjitha provave dhe analizimit të tyre, sot kemi ngritur aktakuzë kundër 45 të pandehurve. Për ta ngritur aktin na u është dashur të presim gjatë, ndoshta edhe një vit. Pranimi i rezultateve të ekzaminimeve që janë kryer jashtë vendit, ishte shkaku kryesor i vonimit të ngritjes së aktakuzës”, shtoi ai.
Në orët e para të 24 shtatorit të 2023-tës, në fshatin Banjskë të Zveçanit, policia kishte vërejtur se ishin vendosur dy kamionë me anë të cilëve ishte bllokuar rruga.
Gjatë ndërhyrjes së policisë, grupi kriminal serbë kishte shtënë në drejtim të Policisë së Kosovës, me ç’rast ishte vrarë polici Afrim Bunjaku, si dhe ishte plagosur zyrtari policor, Alban Rashiti.
