37 persona, duke përfshirë tre amerikanë, një britanik, një belg dhe një kanadez, janë dënuar me vdekje për përpjekje për të rrëzuar presidentin e Republikës Demokratike të Kongos, raporton BBC .
Burrat akuzohen se drejtuan një sulm në pallatin presidencial dhe shtëpinë e një aleati të presidentit Félix Tshisekedi në maj.
Christian Malanga, një shtetas amerikan me origjinë kongoleze, drejtuesi i dyshuar i komplotit, u vra gjatë sulmit, së bashku me pesë të tjerë.
Në Gjykatën Ushtarake u gjykuan gjithsej 51 persona. Djali i Malanga, Marcel, një nga shtetasit amerikanë të dënuar me vdekje, i tha më parë gjykatës se babai i tij e kishte kërcënuar se do ta vriste nëse nuk merrte pjesë. Edhe shoku i tij Tyler Thompson u dënua me vdekje. Të dy kanë lindur në shtetin amerikan të Utah.
Pyetja është nëse shteti do ta zbatojë realisht dënimin
Njerka e tij Miranda Thompson i tha BBC-së në qershor se familja “nuk e kishte idenë” se si ai përfundoi në DR Kongo. “Ne ishim në tronditje të plotë për atë që po ndodhte. Nuk dinim asgjë, përveç asaj që lexuam në internet,” tha ajo.
Një amerikan i tretë, Benjamin Zalman-Polun, kishte interesa biznesi me Christian Malang. Jean-Jacques Wondo, një burrë me nënshtetësi kongoleze dhe belge, u dënua gjithashtu me vdekje.
Human Rights Watch më parë e përshkroi atë si një studiues të shquar mbi politikën dhe sigurinë rajonale dhe sugjeroi se provat që e lidhnin atë me përpjekjen për grusht shteti ishin të dobëta. Agjencia e lajmeve AFP raporton se shtetasit britanikë dhe kanadezë janë me origjinë kongoleze.
Gjykata dëgjoi se shtetasi britanik Youssouf Ezangi ndihmoi në rekrutimin e disa prej të tjerëve që morën pjesë. Nga 51 të akuzuarit, 14 persona janë shpallur të pafajshëm dhe janë liruar, ndërsa gjykata ka konstatuar se nuk kanë lidhje me sulmin. Pjesa tjetër u dënua me vdekje. Të dënuarit kanë pesë ditë kohë për të apeluar dënimin.
Dënimet me vdekje nuk janë kryer në DR Kongo për dy dekada, dhe të dënuarit vuajnë burgim të përjetshëm.
Megjithatë, qeveria e hoqi këtë moratorium në mars të këtij viti, duke përmendur nevojën për largimin e “tradhtarëve”. Megjithatë, asnjë dënim me vdekje nuk është kryer që atëherë, kështu që është e diskutueshme nëse ato do të zbatohen realisht.
