I planifikuar që të zhvillohet më 17 shtator, takimi i përbashkët i kryenegociatorëve të Kosovës dhe të Serbisë, duket se nuk do të ndodhë për shkak të mospajtimit në përpilimin e agjendës së diskutimeve.
Zëvendëskryeministri i Kosovës, Besnik Bislimi, nëpërmjet rrjeteve sociale konfirmoi gatishmërinë e palës kosovare për mbajtjen e takimit trepalësh të paraparë për të martën që vjen.
Sipas tij, Serbia është ajo e cila ka refuzuar agjendën e ndërmjetësit, duke u përpjekur, të imponojë pika të rendit të ditës të destinuara kryesisht për konsum të brendshëm politik.
Se kishte keqkuptime rreth agjendës, këtë e kanë konfirmuar disa burime në Bashkimin Evropian. Por këta zyrtar shpjeguan se të dyja palët janë përgjegjëse për dështimin eventual të mbajtjes së takimit trepalësh. Gjithnjë sipas këtyre burimeve të dyja palët u përpoqën të diktojnë agjendën e takimit trepalëshit dhe nuk u dakorduan me kërkesat e ndërsjella, teksa kanë injoruar propozimin origjinal të palës evropiane.
Megjithatë, merret vesh nga burime mirë të informuara se ndonëse nuk do të ketë takim të përbashkët, të dy kryengociatorët kanë konfirmuar ardhjen në Bruksel më datën 17 shtator.
Kjo nënkupton se së paku se të dytë, Besnik Bislmi dhe Petar Petkoviq, në rast se arrijnë në kryeqendrën evropiane, do të zhvillojnë biseda të ndara me emisarin evropian për dialog, Miroslav Lajçak.
