Eksperti i fushës së sigurisë Hyzri Salihu, sado që nuk e nënçmon situatën e krijuar me këto 7 kërkesat e Aleksandër Vuqiqit, adresuar Kosovës dhe faktorit ndërkombëtar, ai është i bindur se ato do i shërbejnë atij më shumë për konsum politik dhe shantazh të dyanshëm, se sa që do të kenë efektin e tyre ndikues në zhvillimet për të cilat adresohen.
“E ka për konsum të brendshëm dhe për të “ kërcënuar “ bashkësinë ndërkombëtare për ti bërë presion Kosovës. Dhe, edhe ajo që ka thënë 72 orë do të thotë se ai është vetëm zëdhënës sepse në serbi vendos familja Markoviq – vija e Milloshit dhe Daçiqit. Pra, Vuçiq është zëdhënës i familjes mafioze -terroriste Markoviq, tha Salihu për Kosova Times.
Ai po ashtu ka tërhequr vërejtjen se duhet të jemi të vetëdijshëm se në situatë të pritshme Rusia nuk ka arsye të përfshihet në një luftë, nëse në rajonin Ballkanik nuk mundë të krijohet një precedent.
“Precedent është dhe do të jetë Serbia, për aq kohë sa orientimi i saj politik do të jetë me përparësi orientimi në Moskë. Shtrëngimi ndaj Serbisë nuk është vetëm objekt amerikan apo evropian, por edhe i popujve dhe shteteve fqinjë që rrezikohen prej qëndrimit agresiv të saj. Të pa imunizuar nga goditjet terroriste shtetet shqiptare duhet të rrisin vigjilencën në tërë dimensionin e parandalimit të tyre< tha Salihu për “Kosova Times”.
Salihu thotë se rrezikut për sigurinë kombëtare nga veriu, përballë qëndrimit të pastabilizuar të Serbisë në rajon, rrezikut prej terrorizmit ndërkombëtar dhe rreziqeve që sjellin efektet e forta të përfshirjes në rrjetet e trafiqeve dhe krimit të organizuar ndërkombëtar, nxitja në të gjithë format e emigracionit nga jashtë dhe brenda vendit, janë disa nga sfidat për të ardhmen.
“Tentativa e terrorizmit shtetëror serb me grupet e specializuara paramilitare në 24 shtator 2023 rrotull manastirit të Banjskë dhe skenari për të nxitur “revoltën popullore serbe” për ta kapur vijën e Ibrit, janë raste unikale që meritojnë studim të detajuar për mundësinë e përsëritjes në forma të tjera. Ngjarja e 24 shtatorit 2023 në Banjskë të Veriut të Kosovës, është akt terrorist shtetëror, përsëritje e skenarëve kriminalë të Serbisë, paralajmërim për mundësinë e destabilizimit të rajonit drejt një krize të nxehtë ushtarake”, thotë Salihu.
Sipas tij, Ballkani Përëndimor është sinonim i pasigurisë rajonale, kundër dëshirës për anët pozitive të saj, prandaj Ballkani vazhdon të mbetet i pashkëputur nga çështjet etnike dhe problemet territoriale.
Rreziqet sipas Salihut, që vijnë nga ndikimi rus në këtë rajon dhe ato që shfaqen nga jugu nëpërmjet linjave të depërtimit të emigracionit masiv, ekstremizmit fetar, krimit të organizuar dhe terrorizmit transnacional, faktorëve të tjerë të brendshëm, do të kërkojnë bashkëpunimin e ngushtë me SHBA-të dhe vendet e NATO-s.
Prandaj ai thotë qartë se shqiptarët duhet të jenë të vetëdijshëm se stuhitë ballkanike ende nuk kanë përfunduar.
“Do të jetë detyrë e vetë shqiptarëve që të ndërtojnë ura aty ku ka lumenj në mes tyre. Është me të vërtet ,kohë e fundit ,që shqiptarët së pari të identifikojnë vetën kombëtarisht. Historia jonë si Komb është shumë e hidhur që të mos nxjerrim mësim prej saj. Është koha e fundit që ne të bashkohemi dhe të zhvillojmë një kuvendim ndërshqiptar,i cili do të duhej ti përballonte kufijtë e dialogimit të përditshëm ,të vështrimit të pjesshëm të problemit dhe të deklarimit verbal për të ardhmen tonë”, thekson eksperti i Sigurisë Hyzri Salihu.
Sipas tij, duke pasur parasysh pikërisht kushtet dhe rrethanat ekzistuese ,ne duhet të jemi të ndërgjegjshëm për veprimet që do të ndërmarrim në të ardhmen si komb.
“Shqiptarët përherë kanë jetuar në pritje të mëdha. Kemi nevojë për rindërtimin e modelit të jetës,jo sipas diktatit dhe interesave të vjetra ,por sipas modelimit në dimension të ri ,duke e orientuar kombin drejt sigurisë”, është porosia e ekspertit të sigurisë Hyzri Salihu përmes bashkëbisedimit të zhvilluar me “Kosova Times”.
