Kryeministri i Kosovës Albin Kurti ka deklaruar se dialogu me Serbinë ka është në fazë të avancuar pasi mes palëve ka një marrëveshje që duhet të respektohet e të mos shkelet, si dhe të zbatohet pa vonesa.
Në një adresim për media nga Brukseli, pas drekës së shtuar të enjten nga kryetarja e Komisionit Evropian, Ursula von der Leyen, Kurti i ka përsëritur kërkesat e vazhdueshme të Kosovës.
Ai tha se gjatë bashkëbisedimit me Von der Leyen ka përsëritur kërkesat e vazhdueshme të Kosovës që sa më parë të na dërgohet pyetësori nga Komisioni Evropian.
“Ndonëse është me mijëra pyetje ky pyetësor, ne duam t’i përgjigjemi me durim dhe përkushtim. Dialogu ka një fazë të avancuar që nuk duhet asnjëherë të harrohet fakti që kemi marrëveshje, pra Kosova dhe Serbia kanë një marrëveshje në rrugën për normalizim të marrëdhënieve, kjo marrëveshje quhet Marrëveshja Bazike nga shkurti i vitit të kaluar, që e ka edhe aneksin e zbatimit nga dakordimi në Ohër dhe ajo duhet bërë është të respektohet e të mos shkelet, si dhe të zbatohet pa vonesa”, tha Kurti.
Ai tha se në thelb të asaj marrëveshje është së paku njohja reciproke de-facto dhe ajo i ndihmon bashkëpunimit tonë në integrimin evropian.
Duke folur për mjetet e ndara për rajonin e Ballkanit Perëndimor nga BE-ja, kryeministri Kurti pret që edhe Kosova ta marrë pjesën që i takon.
“Janë gjithsej 6 miliardë të ndara për rajonin tonë ku Kosova besoj që do të marrë së paku atë që i takon për nga madhësia dhe puna që kemi bërë, përafërsisht gjysma mund të jenë grante dhe gjysma kredi, por ne presim që të ndodhë qysh në këtë vit për të mos thënë në muajin e ardhshëm”, tha ai.
Tutje ka shtuar Kurti se është i kënaqur që plani i rritjes i dedikohet të gjitha shteteve të Ballkanit, ku edhe Kosova do ta marrë pjesën e saj.
“Jemi të kënaqur që BE-ja e ka rikthyer temën e zgjerimit në tryezë, kjo është përgjigja më e mirë për të gjithë ata që kërcënojnë paqen, sigurinë dhe unitetin në BE e natyrisht bit ë gjitha kundër Federatës ruse”, tha kreu i Qeverisë së Kosovës Albin Kurti.
