Shkruan: Hyzri SALIHU
Objektivat strategjik të zhvillimit kombëtar synojnë fillimisht forcimin e dy shteteve shqiptare në rajon, si trase e sigurtë, mbi të cilën mbështeten interesat kombëtare. Republika e Shqipërisë dhe Republika e Kosovës ende përjetojnë tranzicion e vështirë, i cili konsumon kohën e çmuar të demokratizimit të shoqërisë, duke shkaktuar erozion në përqendrimin e energjive kombëtare.
Forca të jashtme e të brendshme janë të interesuara kundër interesave kombëtare të popullit shqiptar.
Trajtimi me përgjegjësi mundëson evidentimin e urave lidhëse mes strategjisë dhe interesave që burojnë prej saj. Është detyrim shtetëror, rishikimi i dokumenteve kushtetuese për unifikimin e Interesave Kombëtare të Popullit Shqiptar.
Ato janë institucioni që zhvillohen sipas interesave gjeopolitike. Republika e Shqipërisë dhe Republika e Kosovës duhet të bëhen shtete moderne, ura lidhëse të Evropës me Mesdheun dhe rajonin Ballkanik, të kthehen shpresë e pashuar për shqiptarët kudo në botë në rrugën e unifikimit të vlerave të identitetit kombëtar.
Republika e Kosovës është një shtet-territor nën kujdesin amerikan. Me mbështetjen e faktorit amerikan po fiton çështja shqiptare dhe Shqipëria. Politika e re ka prishur kornizat e imponuara në mënyrë të njëanshme nga Evropa. Në Republikën e Kosovës është fituar liria dhe pavarësia, por ende shteti shfaqet pa praninë e ligjëruar të simboleve të identitetit shqiptar.
Republika e Kosovës-Problemi kryesor: Ndërtimi i shtetit të begatë dhe të fortë, njohja juridike e sovranitetit në OKB dhe anëtarësimi në NATO. Vizioni strategjik kërkon objektiva dhe qëndrime në mbrojtje të interesave kombëtare dhe përgatitjen e kushteve politiko-juridike drejt integrimit dhe shkrirjes gjithëshqiptare, për bashkimin në të ardhmen me Republikën e Shqipërisë.
Republika e Shqipërisë është vendi ku mund dhe duhet të realizohet koordinimi i veprimtarisë kombëtare në shërbim të interesave të popullit shqiptar. Shqipëria është shteti amë dhe ka përgjegjësi të madhe për gjenerimin dhe mbështetjen e nevojave të kombit drejt bashkimit, duke respektuar orientimet bazë të Strategjisë Kombëtare.
Ajo ka përgjegjësinë kryesore në realizimin e procesit të integrimit gjithëshqiptar. E ndodhur nën presionin dhe diktatin e një klase politike pa frymë patriotike, roli i shtetit shqiptar po injoron komponentët politik, ideologjik, historik, tradicional dhe material, duke mos u bërë pjesë e procesit të zgjidhjes së çështjes shqiptare-Strategjia Kombëtare si vizion.
