Kryetari i Lidhjes Demokratike të Kosovës (LDK), Lumir Abdixhiku, njoftoi bashkimin e Hysen Sali Çekajt, të djalit të heroit të njohur të Kosovës, Sali Çekaj, në rrugëtimin politik të kësaj partie. Në një ceremoni ku morën pjesë bashkëluftëtarët e të atit, Hysen Çekaj, së bashku me bashkëshorten e tij Valentinën dhe djalin e tyre Saliun, u mirëprit në shtëpinë rugoviste të LDK-së.
Abdixhiku gjithashtu bëri të ditur se Hysen Çekaj do të propozohet si kandidat për deputet nga mërgata, duke përfaqësuar degën e LDK-së në Gjermani.
“Me një arsimim solid nga Universiteti i Shkencave të Aplikuara në Shtutgart dhe një rol të rëndësishëm si ligjërues dhe koordinator në Dekra Akademi, Hysen Çekaj vazhdon rrugën politike dhe ideologjike të babait të tij, duke u bashkuar në lëvizjen për të forcuar të djathtën e bashkuar”, ka shkruar ai.
Abdixhiku përmbylli fjalimin e tij duke theksuar rëndësinë e këtij bashkimi dhe, duke shprehur besimin për suksesin e mëtejshëm të partisë në këtë rrugëtim të përbashkët. /Kosovatimes/
