Koordinatorja e Komiteteve në Lëvizjen Vetëvendosje, Dejona Mihali, është paraqitur në Prokurorinë Speciale.
Gazeta Nacionale ka siguruar pamjet, derisa Mihali është futur në prokurori për t`u intervistuar.
Nga burimet e saj, gazeta merr vesh se ajo do të intervistohet në cilësinë dëshmitares për dy raste të veprave të korrupsionit të nivelit të lartë.
Behët fjalë për rastet ku janë përfshirë zyrtarët e lartë të partisë në pushtet.
Mihali do të intervistohet nga prokuroria për rastin e ish-kryeshefit të Korporatës Energjetike të Kosovës (KEK), Nagip Krasniqi dhe kryeshefin e ndërmarrjes Ibër Lepenc, Faruk Mujka.
Gazeta ka mësuar se Mihali ka dijeni për tenderët që Nagip Krasniqi ka dhënë në KEK, e të cilët është duke i hetuar, prokuroria.
Të dy personat në fjalë vitin e kaluar janë arrestuar dhe kanë qëndruar në paraburgim si të dyshuar për korrupsion.
Të dy rastet janë duke u hetuar nga Prokuroria Speciale e Kosovës.
Ish-kryeshefi i KEK-ut, Nagip Krasniqi dyshohet për veprën penale “Keqpërdorim i autoritetit apo pozitës zyrtare”.
Dyshimet kanë të bëjnë me kontratat për renovimin e kaldajave së bllokut A5.
Kodi Penal i Kosovës këtë vepër e sanksionon me dënim prej 1 deri në 8 vjet burgim.
Prokuroria kishte treguar se për çka dyshohet Fatmir Mujka.
“Pas marrjes së informacionit në bazë të autorizimeve të PSRK-së, Policia e Kosovës ka ndërmarrë një sërë veprimesh hetimore, ndërsa me datë 03.07.2023, ka paraqitur Kallëzim Penal ndaj zyrtarëve me inicialet F.M. dhe H.M., me dyshimin se gjatë kohës sa ishin pjesë e udhëheqësisë në komunën e Mitrovicës së Jugut, gjatë vitit 2021, janë përfshirë në kryerjen e veprës penale “Keqpërdorim i pozitës dhe autoritetit zyrtar”, e sanksionuar me nenin 414 të Kodit Penal të Republikë së Kosovës”, ishte thënë në njoftimin e prokurorisë.
Kush është Dejona Milahi?
Gazeta Nacionale ka raportuar vazhdimisht për ndikimin e madh Dejona Mihalit.
Koordinatorja e Komiteteve në Lëvizjen Vetëvendosje nuk është thjesht një zyrtare e VV-së. Ajo duket se e kontrollon të gjithë partinë në pushtet.
Për një gjë të tillë kishin treguar edhe ish-deputetët e VV-së.
Deputeti Haki Abazi kishte thënë se Dejona Mihali ushtron kontroll të madh mbi grupin parlamentar të Vetëvendosjes.
Është thënë se ajo ua shkruan edhe fjalimet deputetëve të VV-së.
Gjithashtu, është raportuar se është e përfshirë në mënyrë direkte në eliminimet politike brenda partisë në pushtet.
Ajo publikisht është paraqitur shumë rrallë, por ka qenë mjaft aktive në Facebook me statuset e saj.
Në qëndrimet e saj, ajo ka kritikuara ashpër opozitën, mediat dhe sindikatat e pavarur.
