Shërbimi Spitalor dhe Klinik Universitar i Kosovës përmes një komunikate për media ka sqaruar situatën në lidhje me raportimet për mungesën e produktit Phesgo në Klinikën e Onkologjisë.
“Shërbimi Spitalor dhe Klinik Universitar i Kosovës, sqaron se ky produkt jepet në doza të ndryshme për pacientë të ndryshëm, varësisht nga përshkrimi i profesionistëve mjekësor të Klinikës së Onkologjisë. Për shkak të shpenzimit të sasive, sipas planifikimit të Klinikës së Onkologjisë, pra tejkalimit të shpenzimit, siç kishte planifikuar kjo klinikë, për disa ditë ka munguar Phesgo, doza, 600/600 miligramë, kurse me dozën Phsego 1200/600 miligramë, ka pasur furnizim në vazhdimësi”, thuhet në komunikatë.
Sipas SHKUK-së për shkak të rritjes së numrit të pacientëve përtej planifikimit, Klinika e Onkologjisë ka bërë kërkesë për furnizime për tremujorin e katërt dhe furnizimi do të bëhet javën e ardhshme.
“Duhet të theksojmë se pacientët kanë marrë në vazhdimësi këtë terapi, pa mungesë, kurse për shkak të shtimit të kërkesës, ka munguar disa ditë, e që janë marrë masat e menjëhershme dhe pacientët gjatë javës do ta marrin atë”, thuhet tutje në komunikatë. /Kosovatimes/
