Tradicionalisht enët e drurit kanë qenë pjesë e jetës në familjet e Rahovecit dhe jo vetëm. Në këtë komunë sipas zyrtarëve të Drejtorisë së Kulturës, ka pasur shumë përpunues të drurit, por tani ato kanë ngelur vetëm eksponate në muzeun e vogël të këtij qyteti.
“Për fat të keq tani ka shumë pak prej atyre që merren me përpunimin e drurit, për shkak se njerëzit e kanë humbur interesimin, pasi kërkojnë gjëra të luksit për të rregulluar ambientet e brendshme, por edhe gjërat praktike që i përdorin në familje, për gjëra utilitare në gastronomi apo ambiente të tjera jetësore”, tha për RTK-në, Qemajl Krasniqi, zyrtar i drejtorisë së Kulturës në Rahovec.
Një ndër familjet që i ka mbijetuar kohës, është ajo Hasku nga Rahoveci. Aliriza Hasku është gjenerata e tretë që merret me këtë zeje tash e 35 vjet.
Tani familja Hasku po kujdeset për stazhinimin e drurit për përpunim që nis pas vegjetacionit.
“Tharja natyrore zgjat 24 muaj. Gjatë kësaj periudhe zhvillohet procesi hidroliza ose thënë ndryshe shpërlarja e etanineve të ndryshme dhe mbesin vetëm ato të lidhura e të shëndosha që kanë efekt pozitiv në verë dhe raki”, tha Hasku.
Për ta ndërtuar një enë të madhe druri duhet shumë punë, thotë ai, i cili shton se i vetëm nuk mund t’ia dalë, por krah tij punon edhe djali.
Enët që shërbejnë për ruajtjen e verës, bulmetit dhe perimeve të tjera të konservuara janë produkt i tij dhe djalit, që shënon brezin e katërt. Deri më tani kanë punuar vetëm mekanikisht, por në vitin 2021 kanë përfituar përmes grantit qeveritar një makineri që ua ka shkurtuar shumë procesin e punës.
“Kjo makinë ma ka shkurtu procesin e punës për katër herë, ky operacion pune është dashur të bëhet për 40 minuta deri në një orë, ndërsa tani e bëjmë për 10 minuta maksimumi 12 minuta”, shtoi Hasku.
Kërkesat më të mëdha për enët e drurit i kanë veraritë, por tani edhe sektori i hotelerisë dhe gastronomisë kanë filluar të përdorin pajisje të tilla, pasi konsiderohen shumë ekologjike.
