Nga Shkupi, Gashi theksoi se dy vendet duhet të rrisin bashkëpunimin e tyre për integrimin në BE, si dhe bashkëpunimin në kuadër të NATO-s.

Gjithashtu ai kërkoi më shumë projekte të përbashkëta në fushën ekonomike që do të çonte jo vetëm në zhvillim mes dy vendeve, por edhe të rajonit në tërësi.

“Miqësia dhe bashkëpunimi mes dy vendeve tona duhet të fuqizohet dhe përmirësohet edhe më shumë në të ardhmen. Integrimi në BE dhe bashkëpunimi në kuadër të NATO-s dhe zhvillimi dhe stabilitetin rajonal janë të rëndësishme për dy vendet tona. Në takimin tonë ne shprehëm pritshmërinë dhe shpresën se dy vendet tona do kenë bashkëpunimin e tyre drejt BE dhe kjo është e rëndësishme si për vendet tona dhe për vendet e rajonit. Theksuam se zgjerimi është një nga politikat më të mira gjeostrategjike të unionit dhe me investime afatgjatë për të gjithë Evropën në aspektin e sigurisë dhe ekonomisë. Interes i ndërsjellët për shfrytëzim më efikas të fondeve të BE dhe pjesëmarrje e përbashkët në projekte e reja në kuadër të IPA. Të punohet në thellimin e bashkëpunimit ekonomik në zhvillimin e  projekteve të rëndësishme infrastrukturore, ndërtimi i rrugëve, hekurudhave, linjave energjetike për të rritur potencialin”, u shpreh Gashi.

Spiropali foli edhe për ndryshimet e mundshme nga Gjykata Kushtetuese lidhur me gjuhën shqipe në Maqedoninë e Veriut. Ajo tha se pret që të zbatohet marrëveshja e Ohrit që garanton jo vetëm një përfaqësim të drejtë të shqiptarëve në institucionet e vendit, por edhe për përdorimin e gjuhës shqipe.

“Ne mund të pranojmë me krenari se faktori shqiptar vazhdon të luaj një rol të qenësishëm për ruajtjen e stabilitetit të vendit dhe në marrëdhëniet mes dy vendeve. Siguria e rajonin është e varur edhe nga faktori shqiptar. Në këtë frymë dhe në këtë filozofi jam e sigurt se përfaqësimi i drejtë dhe proporcional i shqiptarëve në institucionet e vendet do vijojë sipas standardeve demokratike, kjo është një nga kushtet për marrëveshjen kornizë të Ohrit. Ne presim me besim dhe shpresojmë që të zbatohet plotësisht ligji për gjuhët. Gjuha shqipe është e shenjtë dhe ka të bëjë me thelbin e identitetit tonë. Cenimi i saj në çdo formë dhemb shumë dhe cenon identitetin tonë, që ne afrojmë në këtë botë të madhe si vlerën tonë. Njohim dhe mirëkuptojmë shqetësimet për mundësitë e ndryshimet e mundshme, varësisht vendimit të pritshëm të Gjykatës Kushtetuese, por presim që ndasi të tilla të ketë zgjidhje sipas klimës që dikton marrëveshja kuadër e Ohrit. Jemi të angazhuar për fqinjësinë e mirë në të gjithë rajonin dhe Shqipëria ka dhënë ndihmën e saj për zgjidhjen e çështjeve përmes dialogut në rajon”, tha Spiropali.

Kryetarja e Kuvendit Spiropali theksoi se BE është busulla drejt të cilës orientohen të dy vendet dhe se vendimet politike duhen të orientohen drejt bashkimit të vendeve në familjen evropiane duke mos lejuar vende nga jashtë të shkaktojnë trazira në rajon.

“Niveli i marrëdhënieve mes nesh është i shkëlqyer dhe pas takimit në Shkup pres që të ritakojë homologun dhe mikun tim në Tiranë. Të angazhohemi në dialogun politik që do të çojë edhe më shumë në përafrimin e dy vendeve tona dhe të çojmë sa më lartë klimën e marrëdhënieve politike dhe njerëzore mes dy vendeve tona. Në Shqipëri ka një vëmendje të posaçme lidhur me zhvillimet dhe marrëdhëniet me Maqedoninë e Veriut. Rotacionet qeverisëse në Shkup nuk do ndikojnë në marrëdhëniet e dy vendeve tona por do jetë pjesë e ciklit të forcimit të marrëdhënieve mes nesh. Të vijojmë dialogun tonë politik në gjitha nivelet. Këtu në rajonin tonë të nxitur shpesh nga vetja brenda dhe akoma më shpesh nga të tjerë jashtë ndodh që të trazohet dhe raporti mes politikës është pak i ndërlikuar. Sot me busull nga Brukseli dhe me sy nga e ardhmja do ndikojë mbi projekte politike të përditshme. Orientimi drejt BE dhe bashkëpunimin në NATO kufizojnë rolin e politikës në ndryshimin e kësaj historie. Sa na përket ne nxisim perspektivën evropiane të Maqedonisë së Veriut. Anëtarësimi në BE mbetet prioriteti ynë strategjik si në politikën e brendshme dhe atë të jashtme. BE duhet të ofrojë një rrugë të qartë dhe të arritshme drejt anëtarësimit për të dyja vendet tona dhe gjithë rajonin. BE mund të stimulojë reformat dhe të nxisë shpresën. Rajoni i përket BE dhe vendet po afrojnë ekonomitë e tyre në tregun evropian. Faktori shqiptar luan rol vendimtar në marrëdhëniet mes dy vendeve tona dhe janë një urë e fortë miqësie e bashkëpunimi”, tha Spiropali.