Dyert e shtëpisë së heroit Afrim Bunjaku u hapën qysh në orët e hershme të së martës. Familjarë të tij rrëfyen për bisedat e fundit që patën me të. Thanë se Afrim Bunjaku me krenari e mbante uniformën e policisë.
Muj Bunjaku, vëllai i heroit të Kosovës, Afrim Bunjaku, ka treguar se telefonatën e fundit me të vëllanë e pati të shtunën e 23 shtatorit të 2023-s. Një ditë pas, mori lajmin tragjik se Afrim Bunjaku ra heroikisht, duke mbrojtur tokën e Republikës së Kosovës.
Nën emocione, teksa rrëfen se si e mori lajmin e kobshëm për të vëllanë, Bunjaku tregon se Afrimi e kishte dashur shumë uniformën e Policisë.
“Unë jam njoftu prej djalit të axhës, unë jetoj në Hanover, edhe ai është në at qytet. Më ka telefonu në mëngjes e më ka thënë që Afrimi është plagosë rëndë, mandej ka ardhë te unë e më ka tregu që është vra. Është rast shumë i rëndë”, tha mes tjerash Muj Bunjaku.
Për punën në polici e detyrat që i ishin dhënë në veri, Afrimi kishte diskutuar shumë herë me xhaxhanë, Gani Bunjakun.
“Më tha nuk frikësohem se nuk jam duke shku në Serbi por jam duke shku në Mitrovicën e Kosovës. Më tha gjaku i shqiptarit, edhe i fundit po të jetë, duhet me mbrojtë atë pjesë”, u shpreh Gani Bunjaku.
E lotët për rënien heroike të Afrimit, një vit pas, mezi i mban kushëriri i tij.
“Afrimi nuk paska qenë vetëm i yni, paska qenë i krejt Kosovës. E ka deshtë pa masë uniformën”, tha Qazim Bunjaku, djali i xhaxhait të Afrimit.
Flamuri kombëtar dhe ai i Kosovës do të vazhdojnë të valëviten në shtëpinë e heroit Afrim Bunjaku, e kujtimi për të do të mbetet i pavdekshëm.
