Instituti për Hulumtime dhe të Drejtat e Njeriut (IHDNj), ka mbajtur konferencë për media, përmes së cilës është bërë lansimi i raportit “Perceptimet e të rinjve mbi Dhunën Seksuale dhe Ngacmimet seksuale”. Raporti është pjesë e projektit “Thuaj Jo Gjuhës së Urrejtjes dhe Ngacmimeve Seksuale”, ndërsa në konferencë u diskutua për hapat e ardhshëm në parandalimin e dhunës dhe zvogëlimin e shkeljeve ligjore ndër të mitur.
Ministrja e Drejtësisë, Albulena Haxhiu tha se angazhimi ndërinstitucional është shumë i rëndësishëm në luftimin e këtyre dukurive negative. Ajo potencoi se ngacmimi seksual është i ndaluar me ligj dhe se është vepër penale.
“Gjatë gjithë kësaj kohe kemi ndërmarrë shumë veprime për të adresuar çështjet me të cilat përballet shoqëria jonë, qoftë dhuna fizike apo psikike. Hulumtimi që sot e kemi para vetes duhet të ndahet sa më shumë edhe me shkollat në mënyrë që të rinjtë tanë të kuptojnë që ngacmimi seksual është i ndaluar dhe është vepër penale. Ngacmimi seksual është një dukuri e papranueshme e cila jo vetëm lëndon individët, por ndikon negativisht në klimën tonë arsimore”, tha Haxhiu.
Ajo tha se shkolla duhet të jetë një hapësirë ku çdo nxënës duhet të ndihet i sigurt dhe kjo është një përgjegjësi që i përket të gjithëve .
Kurse ministrja e Arsimit, Shkencës, Teknologjisë dhe Inovacionit, tha se rekomandimet në këtë raport nuk kanë qenë të papritura për ta.
“ Ajo që keni rekomanduar mbi të gjitha që të ketë fushata vetëdijësuese, jo vetëm se na bind për punën që jemi duke e bërë në këtë drejtim, por përforcon edhe praktikat e reflektimit që kemi pasur nga terreni”, tha Nagavci duke përmendur edhe iniciativat dhe puntoritë nëpër komuna që kanë ndërmarrë si ministri në këtë drejtim.
Ajo theksoi se për shumë vite sa ka qenë në detyra në fushën e arsimit është përballur shumë shpesh me situata kur përfaqësues në krye të institucioneve nuk kanë qenë në njohuri të legjislacionit në fuqi, por edhe të veprimeve të cilat mund të konsiderohen si ngacmime seksuale.
Ndsërsa Kaltrina Rexhepi – Dragusha, drejtoreshë Ekzekutive-Instituti për Hulumtime dhe të Drejtat e Njeriut tha se raporti ka ardhur pas rritjes së rasteve të dhunës dhe sulmeve seksuale që janë duke u raportuar, ku target i shpeshtë janë të miturit dhe të rinjtë.
Ajo tha se konferenca ka papasur për synim të mbledhë së bashku aktorë kryesorë, përfshirë politikanë, praktikues dhe avokatë, për të diskutuar hapat e ardhshëm në parandalimin e dhunës dhe zvogëlimin e shkeljeve ligjore ndër të mitur.
Projekti është zhvilluar në dy komuna, Prishtinë dhe Lipjan, dhe përfshin ligjërata për më shumë se 1000 nxënës të klasës së 10-të të shkollave të mesme dhe pjesëmarrjen në hulumtim të rreth 400 nxënësve. Ky projekt është mbështetur nga Iniciativa “Human Rightivism” dhe zbatuar nga Fondi për Zhvillimin e Komunitetit (CDF), me mbështetjen e Ambasadës Suedeze në Kosovë.
