Mospërfshirja e projektit të ujërave të zeza për fshatrat Isniq, Dubovikë, Prapaqan dhe Strellc në buxhetin e këtij viti, vazhdon të jetë ndër shqetësimet kryesore të banorëve nga ky lokalitet.
Gëzim Bojku, përfaqësues i Isniqit, thotë se një gjë e tillë po u shkakton probleme të mëdha banorëve këtu.
“Ujërat e zeza, shumica apo 90 % e tyre janë të dala në vijat e fshatit, në kanalet e ujitjes të cilat derdhen aty në fushë dhe prandaj kemi probleme edhe në mes familjeve që ja gjuan përpara atje njëri tjetrit, jemi duke u munduar me i evitua mos me pas probleme këtu i kisha lut të jetë ndër projektet më vitale për këto fshatra, fshatra që kemi mbetur në mëshirën e zotit për këto edhe ndotja është shumë e madhe”, ka thënë Bojku.
E zyrtarët e komunës thonë se mosrealizimi i këtij projekti që kap vlerën prej 27 milionë eurosh, është pasojë e mungesës së mjeteve për të cilat komuna është duke bërë përpjekje të mëdha. Ata thonë se po presin mbështetje nga Qeveria, por edhe donatorë të huaj, meqë vlera e projektit është shumë e madhe.
“Ne si komunë kemi aplikuar në Fondet e BE-së dhe në Bankën Botërore por njëkohësisht e kemi dorëzuar edhe në nivel qendror në kuadër të Ministrisë së Ambientit por prapë se prapë jemi në pritje të donatorëve. Banorët kanë të drejtë dhe në fakt është shqetësim për ta. Shpresoj që në momentin që komuna të përfitoi donacione nga jashtë por njëkohësisht presim ndihmën e qeverisë me filluar me implementu nëpër faza të caktuara”, ka thënë Izet Zenuni, drejtor i SHP në Deçan.
Mungesa e këtij projekti në listën e prioriteteve për këtë vit po kritikohet edhe nga opozita në Deçan.
“Komuna mbase edhe mund ta arsyetojë mos realizimin e atij projekti në mungesë fondesh, por përderisa ka buxhet të investohet në pjesën e epërme të komunës sonë e në veçanti në bjeshkë, mendoj që është dashur t’i jepej prioritet që ai projekt të realizohet, sepse projekti nuk është i përfunduar gjithandej komunës. Ka lokalitete në të cilat është trajtuar disi, është larguar paksa prej vendbanimeve, por nuk është që është trajtuar seriozisht dhe t’i jepet zgjidhje e përhershme problemit me ujëra të zeza në komunën tonë”, ka thënë Faton Selmanaj, asamblist i VV-së në Deçan.
Përndryshe, sipas zyrtarëve deçanas, përtej fshatrave të kësaj komune, problemi i ujërave të zeza dhe trajtimi i tyre sipas kritereve të kërkuara vazhdon të mbetet ndër problemet më të mëdha në Kosovë.
