Ambasadori rus Aleksandar Bocan-Kharchenko tha sot se marrëdhëniet mes Beogradit dhe Moskës janë të vendosura mirë dhe se vendimi i Serbisë për të mos vendosur sanksione ndaj Rusisë është një bazë e mirë për bashkëpunim të vazhdueshëm.
Ai shtoi se Rusia i qëndron përkrah Beogradit për çështjen e Kosovës dhe se një nga pikat e krizës në rajon është Republika Srpska ku, tha ai, do ta mbrojë Marrëveshjen e Dejtonit.
“Ne do të mbrojmë pavarësinë dhe integritetin territorial të Serbisë me të gjitha forcat tona, si dhe vendin tonë”, tha ai.
Në nivel ndërkombëtar, vlerësoi ai, situata po intensifikohet dhe bashkësia ndërkombëtare është në “prag të një katastrofe, pasojat e së cilës Perëndimi nuk dëshiron t’i kuptojë”.
Ai vlerësoi se lufta ndërmjet NATO-s dhe Rusisë po zhvillohet në Ukrainë, në kurriz të ukrainasve dhe se dominimi i dollarit në botë është i papranueshëm dhe se të gjithë do të duhet të pajtohen me botën multipolare.
Ai gjithashtu shprehu mendimin e tij personal se fjalimi i presidentit serb Aleksandar Vuçiq në OKB ishte “i guximshëm, i ashpër dhe konsistent” dhe se ai dallohej nga “pozicioni i përbashkët perëndimor”.
