Instituti Kombëtar i Shëndetësisë Publike të Kosovës (IKShPK) ka bërë të ditur sot se vajzat nga mosha 13 deri në 21-vjeç tani e tutje do të mund ta marrin vaksinën kundër Human Papilloma Virusit (HPV), i cili i mbron ato prej kancerit të qafës së mitrës.
Deri më tani, kjo vaksinë u është dhënë vetëm vajzave të klasave të gjashta (12-vjeçare), sipas kalendarit të rregullt të vaksinimit.
Po ashtu, IKShPK ka bërë të ditur se tani ka filluar faza e dytë, gjatë të cilës, deri më 31 dhjetor vaksinën kundër HPV mund ta marrin edhe vajzat të cilat për arsye të ndryshme, nuk janë vaksinuar gjatë fazës së parë.
IKShPK njofton se vaksinimi për grupmoshën 13-21 bëhet në baza vullnetare, nëpër të gjitha Qendrat Kryesore të Mjekësisë Familjare në komunat përkatëse dhe në IKShPK. /Kosovatimes/
