Shkruan: Florim ZEQA
Lidhja e subjekteve politike me mërgatën duhet të jetë e sinqertë dhe reciproke, ndryshe mbetet e pa vlerë dhe e pa nder! Lidhjet apo marrëdhëniet e shtetit me mërgatën duhet të jenë reciproke, ndryshe nuk sjellin rezultate të dëshiruara nga të dyja palët!
Dashuria e pashtershme e mërgimtarëve për shtetin
Për t’u arritur një lidhje e mirëfilltë dhe e njëmend mes mërgatës dhe shtetit, këta të fundit, pra shtetarët (politikanët) duhet të tregohen më të kujdesshëm dhe më të sinqertë ndaj mërgatës për 365 ditët e vitit kalendarik e jo vetëm në kohë të fushatave zgjedhore.
Lidhja shtet-mërgatë duhet të funksionojë sikurse dashuria e Nënës ndaj fëmijës që e ka në emigrim, e cila lidhje nuk është e bazuar në interes por në dashuri të sinqertë dhe reciproke, e cila rezulton me vizita të shpeshta të fëmijëve te prindërit në vendlindje!
Viteve të fundit lidhjet e dashurisë shtet-mërgatë janë zbehur në masë të madhe, jo për shkakun e mërgimtarëve, por të shtetarëve (politikanëve), të cilëve për mërgatën u bie ndërmend vetëm në prag të fushatave zgjedhore!
Ndërsa dashuria e mërgimtarëve për shtetin dhe atdheun e tyre rri e zgjuar çdo herë, e cila shpërthen si vullkan në çdo kohë të pushimeve verore, të cilët vërshojnë rrugët tokësore dhe ato ajrore për të zbarkuar në tokën e bekuar të atdheut të tyre të shenjtë.
Veprimtarët dhe aktivistët e mërgatës nuk ndalen asnjëherë, zhvillojnë aktivitete nga më të ndryshmet në mbrojtje të traditave dhe të kulturës shqiptare, bëjnë qindra e mijëra kilometra për të marrë pjesë në një takim me shtetarët (politikanët), pa dallim pushtet dhe opozitë duke shpenzuar me qindra euro, dhe bërë rrugë të gjatë vajtje-ardhje për të takuar të preferuarit e tyre!
Ndërsa politikanët udhëtimin e bëjnë pak më ndryshe dhe më komod (me aeroplan), me shpenzime të shtetit apo partisë që i dërgon. Edhe pse, askush nuk e di koston e saktë të vizitave të politikanëve në shtetet perëndimore, një gjë është e sigurt, ato shpenzime nuk i mbulojnë nga xhepi i tyre!
Dhe pikërisht këtu e ka zanafillën padrejtësia dhe pabarazia qytetare në të cilën thirren shtetarët (politikanët) e ditëve të sotme, të cilët bëjnë jetë “sheikësh” në Kosovë, kurse mërgimtarët i kalojnë ‘shtatë rrathët e ferrit’ për të ardhur teri tek ekzistenca dhe mirëqenia e familjeve të tyre në shtetin e huaj!
Mërgimtarët dhanë djersën dhe gjakun, pushtetarët morën gjithçka nga shteti
Për dallim nga partitë politike të Kosovës që tani e 25 vjet më radhë i kanë shikuar vetëm interesat e tyre politike jo interesin e qytetarëve, pa bërë asgjë për mërgatën, këta të fundit kanë sakrifikuar gjithçka për shtetin dhe mirëqenien e popullatës në Kosovë, duke dërguar mjete financiare për familjarët e tyre dhe ndihmuar njerëzit me nevojë, për të cilët nuk brengosen politikanët e ditëve të sotme.
Janë me dhjetëra shoqata dhe organizime të mërgatës, të cilat janë duke e luajtur rolin e shtetarëve me ndihmat solidare për të pastrehët dhe njerëzit me nevoja të veçanta, që përkujdesen për shërimin e bashkatdhetarëve në vendlindje me sëmundje të rënda dhe kancerogjene!
Shumica e qytetarëve që jetojnë në Kosovë dhe mërgimtarët në Diasporë e kanë pritur në Kosovë ndryshe nga kjo e sotmja!
E kanë pritur një Kosovë me të zhvilluar dhe më demokratike, ku funksionon ligji dhe drejtësia.
E kanë pritur një Kosovë me barazi qytetare e jo diskriminuese në baza partiake, fetare dhe racore!
Edhe përkundër padrejtësive të shumta që çdo ditë ndodhin në shtetin çfarë e dëshiruan, mërgimtarët asnjëherë nuk hoqën dorë nga shteti i tyre, nuk hoqën dorë nga veprimet humanitare për të ndihmuar njerëzit nevojë dhe shtetin përmes investimeve kapitale në vendlindje!
Republika e Kosovës është produkt i shumë gjeneratave, i ndërtuar me gjakun e dëshmorëve dhe heronjve, me mundin dhe sakrificën e shumë brezave të mërgimtarëve që dhanë gjithçka që patën për shtetin e Kosovës.
Mërgimtarët që dhanë më së shumti për lirinë e Kosovës janë më të harruarit dhe më të anashkaluarit nga shtetarët (politikanët) lakmitar, ashtu siç janë harruar dëshmorët dhe heronjtë që e dhanë më të shtrenjtën-jetën e tyre për Lirinë e Kosovës. Një gjë mos e harroni se djersët e mërgimtarëve janë pika gjaku në Dhe të huaj që janë duke u tretur dita-ditës me mallin e pashuar për kthim në atdhe!
