Afaristi i njohur Fadil M. Halili ka njoftuar për një mundësi të re për diasporën kosovare që të investojë në vendlindje përmes skemës së garantimit të kredisë nga Fondi Kosovar për Garanci Kreditore (FKGK). Kjo dritare investimesh lejon investitorët nga diaspora të marrin kredi deri në 3 milionë euro nga bankat komerciale, me një garanci deri në 80% e shumës, nëse përmbushen kërkesat specifike ligjore dhe financiare.
“FKGK është në fazën finale të nënshkrimit të marrëveshjeve me Institucionet e Regjistruara Financiare, duke krijuar kështu një mundësi unike për bashkatdhetarët që dëshirojnë të krijojnë ose të mbështesin biznese të reja në Kosovë”, ka shkruar ai.
Halili ka thënë se, kreditë ofrojnë afate të shlyerjes deri në 84 muaj, me qëllime që përfshijnë investime afariste në asete fikse, pajisje, dhe kapital qarkullues.
“Dritarja për Investime të Diasporës kërkon që investitori nga diaspora të zotërojë së paku 30% të pronësisë së biznesit dhe të ofrojë një plan të qartë biznesi duke përmbushur të gjitha kërkesat ligjore dhe rregullat përkatëse në Kosovë”, ka shkruar ai. /Kosovatimes/
