Analistët politik kanë reaguar pas mbylljes para skadimit të afatit të shpallur nga Qeveria, lidhur me thirrjen për aplikim nga ana e qytetarëve për të përfituar subvencionimin e blerjes së pajisjeve efiçiente për ngrohje.
Sikur në shumë raste të tjera, edhe lidhur me këtë thirrje, Qeveria e ka ndërprerë para kohe afatin e aplikimit për qytetarët e interesuar, duke u thirrur se është arritur shifra e mjaftueshme e aplikantëve dhe kaq!!!
Florim Zeqa: Skandal me faktografi për hetim edhe nga Prokuroria Speciale
Analisti politik Florim Zeqa, konsideron se mbyllja para kohe e thirrjes publike ndaj qytetarëve për aplikim për subvencionim për pajisjet efiçiente për ngrohje nga ana e kryeministrit, përveçse paraqet shkelje ligjore është edhe fyerje ndaj qytetarëve të cilët nuk trajtohen në mënyrë të barabartë nga shteti i tyre, në këtë rast nga ‘Qeveria e Kosovës’!
”Vendimi i “kryezotit” Albin Kurti që të mbyllet para kohe thirrja publike ndaj qytetarëve, ngjallë shumë dyshime tek këta të fundit për abuzim me listën e përfituesve, siç ka ndodhur paraprakisht me të gjitha konkurset dhe tenderët, pa ju dhënë mundësi konkurrimi të gjithë të interesuarve! Mbyllja 6 ditë para kohe e thirrjes publike, të cilën mund ta quajmë ‘Konkurs Publik’ për subvencionimin e efiçiencës së energjisë, i mbështetur edhe nga Bashkimi Evropian është dashur të zbatohet në përpikëri nga Ministria e Ekonomisë, përfshirë afatet kohore, të cilat janë esenciale për qytetarët e vendit, kur dihet se jo të gjithë qytetarët kanë qasje në rrjetet sociale dhe përcjelljen e trukeve të qeverisë”, thotë analisti Zeqa.
Madje ai shton se ky skandal ka mjaft argumente që të hetohet edhe nga Prokuroria Speciale.
“Privimi 6 ditë para kohe i qytetarëve nga e drejta për aplikim është shkelje e rëndë ligjore, me të cilën duhet të merret Prokuroria Speciale, pasi kjo ngre dyshime të bazuara që përfituesit e subvencionimit për pajisjet efiçiente për ngrohje janë militantët dhe anëtarësia partisë në pushtet e jo edhe qytetarët me bindje dhe përkatësi tjetër partiake”, thekson Zeqa.
Mbyllja 6 ditë para kohe e një konkurrimi të hapur publik, sipas tij, është e njëjtë sikur ta mbyllësh një proces zgjedhor 6 orë para kohe!
“Që i bie, nuk ka rëndësi kush kandidoi fituesit i përcaktojmë ne, të tjerët le t’i bien kavallit e të ëndërrojnë për vitin tjetër! Ky mentalitet qeverisës të kujton kohën e sistemit të kaluar monist, në kohën kur hapeshin konkurset për vende të punës, njerëzit (e pushtetit) ishin duke punuar. Pra, konkursi hapej sa për sy e faqe, për të mbuluar abuzimet me konkursin. Ngjashëm ka bërë edhe kryeministri apo siç e quajta në fillim “kryezoti” i shtetit të kapur, i cili nuk përfill rregulla dhe ligje në këtë vend”, tha Zeqa për “Kosova Times”.
Arsyetimet absurde të Qeverisë, “se Komisionet për vlerësimin e aplikacioneve kanë filluar punën e tyre të procesit të verifikimit të aplikacioneve dhe dokumentacionit të nevojshëm” pa u mbyllur aplikimi, sipas analistit Florim Zeqa, e vërteton konstatimin e tij për shkelje ligjore të Ministrisë së Ekonomisë me urdhrat e kryeministrit Albin Kurti.
“Ndërsa paralajmërimi se “të gjithë ata që kanë aplikuar do të njoftohen për ecurinë e procesit përmes mjeteve të informimit dhe rrjeteve sociale të Ministrisë së Ekonomisë” e tregon papërgjegjësinë dhe mungesën e transparencës, e cila përkthehet në abuzim dhe mashtrim të qytetarëve, dhe përfitime personale në këmbim të dhënies së subvencioneve. E cila gjë, e bënë përgjegjëse ‘Qeverinë e Kosovës’ për shkelje të rënda ligjore, për korrupsion dhe krim të organizuar të udhëhequr nga “njeriu me duar të pastra” në sytë e qytetarëve! Drejtësia vonon, por nuk harron”, tha Zeqa për “Kosova Times”.
Blerim Burjani: Subvencionimi për ngrohje projekt ad–hoc me mundësi të limituara buxhetore
Ndryshe mendon analisti Blerim Burjani. Ai konsideron se megjithatë Qeveria ka vepruar drejtë pasi që është “mbushur kupa” dhe nuk ka pasur mundësi për më shumë aplikacione të cilat do të përfitonin nga një projekt që megjithatë është me kapacitete të kufizuara.
“Kjo iniciativë është e limituar. Pra, derisa të përmbushet kuota e subvencionit. Pra kjo nuk nënkupton se do të përfitojnë të gjithë, por një kuotë subvencionimi me një numër të caktuar të familjeve aplikuese. Pra mundësit dhe buxheti janë të limituara, e përkrahja e të gjithëve nuk është e mundshme. Tash këto vlerësohen subvencione ad-hoc, për çka kjo Qeveri ofron edhe këto mundësi të limituara”, tha analisti Blerim Burjani për “Kosova Times”.