Policia e Kosovës, Drejtoria për Hetimin Kundër Narkotikëve, ka realizuar dy operacione policore në tri rajone atë të Prishtinës, Mitrovicës së Jugut dhe Pejës.
Rasti i parë i koduar “Pritja”, siç ka bërë të ditur policia është realizuar në katër lokacione të ndryshme i cili ka rezultuar me sekuestrimin e një sasie prej mbi 25 kg, substancë narkotike të llojit marihuanë, si dhe arrestimin e tre personave të dyshuar që të tre shtetas kosovarë.
“Njësitet policore në cilësi të provave materiale kanë sekuestruar edhe dy vetura dhe tre telefona celular. Vlera e substancës narkotike arrin shumën prej mbi 45 000 euro. Dyshohet se një pjesë e drogës kishte destinim tregun vendor përderisa pjesa tjetër tregun e jashtëm”, thuhet në njoftimin policor.
Ndërsa rasti i dytë i koduar “Kristali” i hetuar nga njësia rajonale e narkotikëve në Prishtinë ka vënë në pranga një person të dyshuar dhe është sekuestruar një sasi prej mbi një kg, të substancës narkotike të llojit kokainë.
“Në cilësi të provave materiale janë sekuestruar para të gatshme mbi 6800 euro, 1000 dollarë amerikan dhe 3400 funta angleze. Vlera e drogës në këtë rast arrinë shumën prej mbi 50 000 mijë euro”, njoftoi policia.
Veprimet policore në të dyja rastet janë realizuar në bashkëpunim dhe koordinim me Prokurorinë Themelore për Krime të Rënda në Prishtinë.
