Një delegacion i lartë i Bankës Qendrore të Republikës së Kosovës (BQK), i kryesuar nga guvernatori, Ahmet Ismaili, i përbërë nga anëtarët jo-ekzekutivë të Bordit: Nurboja, Latifi dhe Hoxha, mori pjesë në një vizitë zyrtare në Bankën Qendrore të Maltës.
Në një komunikatë për medie bëhet e ditur se në takimin hyrës, delegacioni i BQK-së u prit nga u.d. guvernatori i Bankës Qendrore të Maltës, Alexander Demarco, i shoqëruar nga zëvendësguvernatori Bonello, kryeekonomisti Grech, dhe anëtari jo-ekzekutiv i Bordit, profesor Bezzina.
“Gjatë takimit, guvernatorët e të dy bankave qendrore shkëmbyen informacione rreth zhvillimeve kryesore në sektorin financiar dhe në ekonomi. Guvernatori Ismaili e informoi guvernatorin Demarco për zhvillimet në kornizën ligjore dhe atë rregullative, projektet strategjike të BQK-së, si dhe për qëndrueshmërinë e sistemit financiar të Kosovës. Të dy delegacionet diskutuan kryesisht mbi qeverisjen dhe auditimin, menaxhimin e rrezikut, sistemin e pagesave dhe përgatitjet e duhura për anëtarësim në SEPA, menaxhimin e rezervave ndërkombëtare, parandalimin e pastrimit të parave dhe financimit të terrorizmit, si dhe kërkimet shkencore, ndër të tjera”, thuhet në komunikatë.
Në përfundim të vizitës, palët rikonfirmuan përkushtimin e tyre për bashkëpunim ndërmjet dy institucioneve, ku BQK-ja ka për synim zgjerimin e rrjetit të bankave qendrore partnere si pjesëmarrëse në Eurosistem, menaxhimin e rezervave ndërkombëtare dhe në fusha të tjera të bashkëpunimit.
