Të paktën 192 njerëz u vranë në një valë dhune që filloi muajin e kaluar midis bandave të drogës në shtetin veriperëndimor të Meksikës, Sinaloa, tha Këshilli i Sigurisë Publike i shtetit, raporton Anadolu.
Këshilli njoftoi se që nga 9 shtatori janë raportuar rreth 200 vrasje dhe 226 zhdukje. Rreth 200 familje janë larguar nga dhuna, 180 biznese janë mbyllur dhe 2000 vende pune janë humbur mes konfliktit të armatosur midis fraksioneve kryesore të kartelit Sinaloa.
Panik në mesin e popullatës
Në Meksikë, një luftë e pamëshirshme po shpërthen brenda kartelit më të dhunshëm të vendit. Pas arrestimit më 25 korrik të bosit famëkeq të drogës dhe bashkëthemeluesit të kartelit Sinaloa, Ismael El Mayo Zambada, ka pasur një ndryshim të dhunshëm në dinamikën e pushtetit të kartelit të themeluar nga Zambada dhe Joaquin El Chapo Guzman, i cili po vuan një dënim të përjetshëm në një burgu amerikan.
Lufta midis fraksioneve të kartelit Sinaloa është përhapur në shtetet e tjera kufitare veriore në Meksikë, ku grupet e udhëhequra nga djemtë e Joaquin El Chapo Guzman dhe djali i Ismael El Mayo Zambada ndanë më parë punën e kontrabandës së drogave sintetike në Shtetet e Bashkuara.
Lufta mes dy grupeve ka sjellë kaos në biznesin e trafikut të drogës në vend dhe ka përhapur panik tek popullata, e cila ka frikë nga konflikte të reja.
