Zëvendëskryeministri i Maqedonisë së Veriut, Arben Fetai, në një konferencë për media tha se vendit përfundimisht i duhet një Ligj për Përfaqësim të Drejtë, i cili rregullin kushtetues do ta shndërrojë në obligim ligjor.
“Për Ligjin për Përfaqësim të Drejtë është folur prej vitesh. Unë jam një nga ata që në kuadër të partisë sime Aleanca për Shqiptarët e ka hartuar këtë propozim-ligj me ekspertë ndërkombëtarë. Komisioni i Venecias është një mekanizëm i cili mundëson të sjellim një zgjidhje që do të përshtatet me praktikat ndërkombëtare të Këshillit të Evropës. Natyrisht se këtu duhet përfshihen ekspertë, qytetarë, shoqëria civile dhe organizata ndërkombëtare”, tha ai, raporton RTK.
Nga Bashkimi Demokratik për Integrim thonë se ligji për përfaqësimin e drejtë, duhet të ishte përgatitur para se Gjykata Kushtetuese ta shfuqizojë balancuesin.
“Ligj për Përfaqësim të Drejtë nuk e di si do ta bëjnë, nuk e di se çfarë do të ketë në atë ligj. Atë është dashur ta bëjnë para se të sillet vendimi për heqjen e balancuesit. Pra, të bëhet një debat publik, më parë të tregohet, të jepet si propozim-ligj dhe pastaj ta shohim se a është më i mirë”, tha Diana Toska, deputete e BDI-së.
Kryeministri Hristian Mickovski deklaroi ditë më parë se zgjidhja e re ligjore duhet të jetë në përputhje me rekomandimet e Komisionit të Venecias.
“Balancuesi”, mekanizmi që rregullonte përfaqësimin e drejtë të bashkësive etnike në administratën publike, u shfuqizua gjatë kësaj jave nga Gjykata Kushtetuese.
