Njohës të fushës së sigurisë dhe analistët politikë, kanë reaguar ashpër pas zhvillimeve të fundit rreth FSK-së, duke i cilësuar raportimet dhe përplasjet për FSK-në si një fushatë të dëmshme kundër ushtrisë së Kosovës dhe kundër shtetit duke kërkuar njëherësh nga Kuvendi që me një zë dhe qëndrim, pozitë e opozitë, t’i japin zgjidhje problemit të ngritur me ushqimin, që FSK-ja pa vonesë të ketë shërbimin e vetë të përgatitjes së ushqimit-kuzhinën ushtarake, si të gjitha ushtritë moderne.
Zeqa: Pozita dhe opozita të flasin me një zë për përmirësimin e kushteve të FSK-së
Analisti politik Florim Zeqa, tha për “Kosova Times” se telashet e shfaqura së fundmi me ushqimin e FSK-së, për të cilat u mblodh Kuvendi i Kosovës në seancë të jashtëzakonshme, është një sprovë serioze me të cilën po ballafaqohet Qeveria e Kosovës e cila ka ngecur në procesin e transformimit të plotë të FSK-së në modelin e ushtrive moderne dhe me kapacitete të pa varura infrastrukturore, duke përfshirë të gjitha shërbimet e funksionimit brenda për brenda, në mesin e të cilave vendin kryesor e zë standardi i mirëqenies, e ku bënë pjesë edhe ushqimi i ushtarëve.
“Pa dyshim, fajtor që Ushtria e Kosovës akoma nuk e ka shërbimin e vetë- kuzhinën e përgatitjes dhe të servimit të ushqimit, sikur që e kanë pasur dhe vazhdojnë ta kenë të gjitha ushtritë e rajonit, por të jetë e varur nga tenderomania me qëllime të përfitimit dhe bërjes pazare të pista duke përfituar grupe kriminale të interesit nga ushqimi i ushtarit! Në fakt debati në Kuvend duhej të ishte vendimtar për një kthesë transformimi dhe pavarësimi të FSK-së nga metoda e tanishme e të ushqyerit nga operator të jashtëm duke abuzuar kështu trefish me buxhetin e shtetit, dhe pa vonesë të merret vendimi për ndërtimin e kapaciteteve të brendshme të FSK-së edhe në shërbimin e ushqimit të kompletuar dhe profesionalizuar”, tha Zeqa për “Kosova Times”.
Por sipas tij, gjuha e përdorur në Kuvend dhe kthimi i ushqimit të ushtarëve në kauzë politike, jo vetëm që nuk e ndihmon zgjidhjen e këtij problemi, e komplikon akoma më tepër gjetjen e zgjidhjes afatgjatë dhe të përhershme të ushqimit për ushtarët e FSK-së.
Ai tha se në dukje të parë, plani i presidentes Osmani, duket të jetë një bazë e mirë e fillimit të zgjidhjes, në të cilën përfshihen edhe disa benefite të tjera si; pagesa e shtesave në paga për rrezikshmëri, pagesa e kujdestarisë dhe punës jashtë orarit, pagesa e mëditjeve për pjesëtarët e FSK-së gjatë shkollimit dhe trajnimit jashtë vendit (gjatë tërë periudhës së shkollimit apo trajnimit e jo vetëm për 1 muaj), sigurimi shëndetësor, funksionalizimi i spitalit ushtarak me shërbime të nivelit sekondar dhe terciar mjekësor, përmirësimi i cilësisë së ushqimit me standardet me të larta shëndetësore dhe sanitare, sigurimi i banimit të përballueshëm për ushtarakët dhe familjet e tyre dhe krijimi i fondit kreditues për ushtarakët. E për këto duhet të vendoset me unitet në Kuvend.
“I mbetet Kuvendit të Kosovës që të jetë në nivelin e detyrës, të jetë unik në vendimmarrje lidhur me detyrimet e obligueshme të cilat do të duhej t’ia adreson Qeverisë për zbatim, pa bërë politikë momentale për përfitime elektorale dhe pa ndërtimin e kauzave imagjinare për pushtet. Në të kundërtën, kriza në FSK do të thellohet akoma më shumë dhe do të lëndohet imazhi i shtetit në raport me forcën mbrojtëse të vendit, e cila nuk i përket vetëm pushtetit dhe opozitës, por tërë spektrit politik dhe institucioneve shtetërore, në veçanti Kuvendit të Kosovës për nxjerrjen e një akti ligjor që e garanton zgjidhjen në pako të të gjitha problemeve në FSK”, tha Zeqa për “Kosova Times”.
Miftari: Loja kundër FSK-s e kurdisur nga opozita
Eksperti fushës së sigurisë, ish epror i lartë i UÇK-së dhe TMK-së Naim Miftari, pohon se lojën me kinse ushqimin për FSK-në po e bëjnë direkt partitë opozitare LDK, PDK dhe AAK, pasi, sipas tij, janë mësuar në qeverisjet e tyre që nga pas lufta me marr miliona euro mito nga Beni Dona.
“Pikërisht opozita po e saboton ushqimin e FSK-së për ta sulmuar Qeverinë Kurti tani kur jemi afër zgjedhjeve, Por mos të harrojmë se është e njëjta opozitë që sa ishin vetë në pushtet, përveç korrupsionit në ushqimin për FSK vidhnin edhe në tenderë për veshmbathjen, për armët e deri te municionet e FSK dhe të policisë. Sot kinse të njëjtit qesin lot krokodili kinse për ushtarët e FSK-së. Pse mos me i bërë ushtria, FSK vetë mensat dhe kuzhinierët e vet e me i përgatitë vetë ushqimet. Paramendo në rast të një lufte amendoni se BeniDona e këta milionerët e opozitës mërziten për mungesë të ushqimit për ushtri a… kurrë jo”, tha Miftari për “Kosova Times”.
Ai kërkon që FSK ta ketë një qendër të vetën ku përgatitet ushqimi dhe shpërndahet në tërë objektet ku ka ushtar të FSK-s në detyrë dhe në ato qendra ku ka prezencë të qindra ushtarëve, ata duhet me pas kuzhinën e vetë, ku kuzhinier civil me kontratë, por edhe ushtar të objekteve të mëdha e përgatisin vet ushqimin për ushtrinë, por edhe për policinë kur ka nevojë, pasi kështu mundet edhe me u sigurua që ushtari i Kosovës as polici i Kosovës nuk munden me u helmua nga armiku i shtetit.
Miftari po ashtu thotë se duhet të merret shembull modeli i Gjermanisë, ku ka ndodhur që janë mbyllur dy baza të NATOS për dy javë, pasi uji i pijes së tyre ishte kontaminuar me helme nga agjentët sekret Rus.!
“Pra fajtor për gjendjen jo të mirë në FSK dhe polici, por edhe në tërë Kosovën duhet kërkuar te e kaluara e qeverisjes nga PDK, LDK dhe AAK që mbi 20 vite vidhnin vetëm për veti, për djemtë e vajzat e tyre dhe për klanet e tyre , e sot kinse të njëjti po mërziten për mungesën e ushqimit për FSK dhe për bisedën e Mimozës përmes telefonit me Radojçiqin kurse këta opozita 20 vite rresht i kanë vjedh fondet e FSK-së dhe policisë, dhe i kanë mbajt qeveritë e tyre bashkë me Radojçiqat, do të thotë me Beogradin”, tha Miftari për “Kosova Times”.
Sipas Miftarit “kukamat” për FSK-në janë kukama politike dhe propaganda e opozitës e cila po ju frikësohet zgjedhjeve të lira në shkurtin e vitit të ardhshëm, dhe tani po bëjnë veprime kinse po zbulojnë afera përmes njerëzve dhe oligarkëve të vetë që i kanë në FSK, në, polici, gjyqësi, prokurori, AKI, nëpër OJQ, dhe në media. Meha: Strukturat e Serbisë në aleancë me ato kanë projekt për rrënimin e FSK-së.
Njohësi tjetër i fushës së sigurisë Xhevat Meha ka pohuar për “Kosova Times “ se problemi me sigurimin e ushqimit të ushtareve të FSK-së në skenë del si problem i proceseve të tenderimit. Por në prapaskenë është diçka tjetër, janë përpjekjet e shërbimit sekret serb për ta rrënuar dhe defunksionalizuar Ushtrinë e Kosovë
“Prapa kinse problemeve me tenderimin qëndron rrjeti i fshehtë serbo-rus. Ky rrjet ka shtrirje nëpër të gjitha institucionet e Kosovës. Qendra e vendosjes për këto rrjete, si struktura shtetërore, analizojnë dhe organizojnë veprime për të realizuar synimet e tyre programore. FSK ka ecur shumë mirë në fuqizimin e saj si ushtri e organizuar. Kjo ka alarmuar rrjetin serbo-rus për të kryer diçka komprometuese si forcë ushtarake. Përfaqësuesit e interesave të qytetarëve të Kosovës, deputetët, duhet që të kërkojnë nga AKI pastrimin e institucioneve të Kosovës nga rrjeti serbo-rus dhe jo t’u hedhin hi syve qytetarëve të Kosovës si knojsit n’maje të plehut”, tha ai.
Meha tha se, pastrimi duhet të fillojë nga partitë politike, së pari kryetarët, pastaj kryesitë e partive e kështu me radhë.
