Guvernatori i Bankës Qendrore të Republikës së Kosovës (BQK), Ahmet Ismaili, së bashku me zëvendësguvernatorët dhe bashkëpunëtorët e tij, ka zhvilluar një takim konstruktiv me delegacionin e Bankës Botërore (BB) nga Washington D.C., të kryesuar nga Alper Ahmet Oguz.
Sipas njoftimit të BQK-së, diskutimet u fokusuan në zhvillimet aktuale në sektorin financiar, bashkëpunimin e vazhdueshëm ndërmjet BB-së dhe BQK-së dhe programet e reja të BB-së, ndër të cilat është ajo për fuqizimin e sektorit financiar, ku përveç aspekteve tjera që ndërlidhen me fushëveprimin e BQK-së, njëra nga komponentët është dedikuar për BQK-në.
“Gjatë takimit, Guvernatori Ismaili po ashtu e informoi delegacionin e BB-së lidhur avancimin e kornizës ligjore dhe rregullative drejt harmonizimit me ato të Bashkimit Evropian, veçanërisht ka nënvizuar progresin e bërë dhe veprimet e ndërmarra nga BQK-ja në përgatitje për procesin e para aplikimit për anëtarësim në Zonën Unike të Pagesave në Euro (SEPA)”, thuhet në njoftim.
Tutje u theksua se në fund të takimit u rikonfirmua përkushtimi për të vazhduar bashkëpunimin me qëllim të zbatimit me sukses të projekteve që kanë ndikim pozitiv drejtpërdrejt në sektorin financiar dhe gjithë ekonominë e vendit. /Kosovatimes/
