Ka dështuar edhe sot të mbahet mbledhja e Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024.
Sërish shkak për dështimin e kësaj mbledhje ka qenë mungesa e deputetëve të Lëvizjes Vetëvendosje.
Kryetari i Komisionit, Shemsedin Dereshaj tha se përkundër faktit që sot nuk ka kuorum, është e vërtetë që ky komision ka shumë të gjetura lidhur me keqpërdorimet dhe keqmenaxhimin.
“Përkundër faktit që sot nuk kemi kuorum dhe nuk mund të vazhdojmë të intervistojmë, unë i lusë ekspertët e angazhuar në këtë proces që të fillojnë përgatitjet e raportit final lidhur me të gjeturat e deritashme, të cilat mendoj që janë të mjaftueshme dhe që dëshmojnë edhe njëherë që edhe procesi i subvencionimit të teksteve shkollore ka qenë pjesë e njëjtë nga skandalet vazhduese të cilat i ka kjo qeveri. Ndaj në rrethana të tilla lusë komisionin që të veprojë në afatin sa më të shkurtër të na e dorëzojë raportin pasi që më 12 nëntor, ne duhet ta përmbyllim raportimin në Kuvendin e Kosovës”, tha ai.
“Nga kjo procedurë e bojkotit, praktikisht e ikjes së mazhorancës nga përgjegjësitë që i kanë marrë me votë, atëherë ekziston mundësia që edhe atje të kemi ndonjë ndryshim të radhës”, tha Dreshaj.
Deputeti i PDK-së, Ardian Kastrati, tha se Vetëvendosje është duke i bojkotuar këto mbledhje, sipas tij, duke mos dashur që të dalin dyshimet që kanë për këtë proces.
“Nga 4 milionë të planifikuara këta kanë kapërcyer në 11 miliardë e këtu ka dyshime të hatashme”, ka thënë ai.
Ndërsa deputeti i PDK-së, Bekim Haxhiu, tha se është mirë që për çështje procedurale, ftesa për intervistim të dëshmitarëve të mbrojtur të vjen sërish javën e ardhshme.
Ndryshe në këtë mbledhje ka qenë e paraparë që të intervistohen Fadile Dyla, Sekretare e Përgjithshme e MASHTI-t; Avni Rexha, U.D. Drejtor i Departamentit të Arsimit Parauniversitar dhe Genc Hamzaj, nga ASHI.
