Korporata Energjetike e Kosovës ka reaguar përmes një njoftimi lidhur me shpërthimin që ka ndodhur në termocentralin Kosova A.
Departamenti për Marrëdhënie me Publikun në KEK ka thënë se nuk ka vend për shqetësim në lidhje me operimin dhe sigurinë në njësitë e Termocentralit Kosova A.
“Njësia A4 është ndalur për shkak të një lidhjeje të shkurtër në kabllot e matjeve, dhe është çkyçur nga puna në mënyrë të rregullt. Ekipet e mirëmbajtjes janë angazhuar që nga momenti i ndaljes së njësisë dhe po punojnë për sanimin e gjendjes, me qëllim që njësia të kthehet në operim sa më shpejt. Zjarri i raportuar në media ka ndodhur jashtë njësisë A4 dhe i njëjti është lokalizuar dhe fikur në kohë optimale nga zjarrfikësit”, thuhet në njoftimin e KEK-ut.
Korporata Energjetike e Kosovës ka ftuar të gjitha mediat dhe palët e interesit që në raste të tilla të kërkojnë informacione zyrtare nga KEK-u, për të evituar krijimin e panikut përmes lajmeve të pavërteta.
Shpërthen kazani në termocentralin Kosova A; Punonjësit: Shpërthim i vogël
Një kazan i Bllokut A4 në Termocentralin Kosova A raportohet se ka shpërthyer mbrëmë. Ka qenë deputeti i PDK-së, Ferat Shala, i cili ka njoftuar për këtë shpërthim.
“Eksplodim i kazanit ‘bojleri i Albinit’, në Termocentralin Kosova A, Blloku A4. Kjo i shkon për shtati mafisë energjetike, sepse tash na duhet import i energjisë!”, ka shkruar ai në Facebook, teksa ka publikuar një video nga zjarri i këtij kazani.
Ekipi i RTK-së në orët e mëngjesit ka shkuar në vendin e ngjarjes, por nuk është lejuar të hyjë brenda objektit.
Megjithatë, punonjës të KEK-ut i thanë RTK-së se shpërthimi ka ndodhur në katin e katërt të termocentralit dhe ka qenë i vogël.
Deri më tash as nga Policia e Kosovës dhe as nga menaxhmenti i KEK-ut nuk janë deklaruar lidhur me këtë rast.
