Mesfushori i Real Madridit, Jude Bellingham, nuk ka arritur të gjejë rrjetën këtë sezon në nëntë ndeshje, ndryshe nga sezoni i kaluar kur kishte realizuar dhjetë gola në dhjetë paraqitjet e tij të para.
Megjithatë, trajneri i Real Madridit, Carlo Ancelotti, ka thënë se është i kënaqur me punën dhe përkushtimin e ish-lojtarit të Borussia Dortmund.
“Jemi të kënaqur me punën e tij”, ka thënë Ancelotti në një konferencë për shtyp të hënën. “Ai punon shumë në fushë, është gjithmonë aty, konkurron, lufton dhe sakrifikon veten.”
Ancelotti e ka pranuar se shifrat e Bellingham këtë sezon janë të ndryshme nga ato të sezonit të kaluar, duke shtuar se befasia e vërtetë ishte numri i golave që ai ka shënuar vitin e kaluar. “Ai shënoi një sasi të madhe golash që askush nuk i priste. Ne gjithmonë do të shënojmë gola, pasi kemi lojtarë me talent të madh sulmues përpara, dhe për momentin, puna që po bën Bellingham është më e rëndësishme për ne”, ka thënë strategu italian.
