Një foshnjë e lindur para kohe është rrëmbyer nga spitali Robert Balanje në qytetin francez Aulne-su-Bois dhe mjekët kanë paralajmëruar se jeta e fëmijës është në rrezik pasi ai ka nevojë për kujdes të veçantë dhe të vazhdueshëm mjekësor, raportojnë sot mediat franceze.
Foshnja 17-ditore Santiago ka lindur para kohe, prandaj është e nevojshme që foshnja të jetë nën mbikëqyrje të vazhdueshme mjekësore, paralajmëroi Ministria e Drejtësisë dhe për shkak të zhdukjes së saj, autoritetet franceze kanë aktivizuar një sistem kërkimi.
Për rrëmbimin dyshohen prindërit e foshnjës, 23 dhe 25 vjeç, të cilët tashmë janë të njohur për policinë, raportoi Bfmtv.
Spitali ka lajmëruar policinë sapo ka vërejtur se foshnja është zhdukur, transmeton Fransinfo, duke shtuar se prindërit janë larguar nga spitali me një çantë dhe se policia dyshon se e kanë fshehur foshnjën në të.
Në zonën Livri-Gargan janë arrestuar pesë persona pranë prindërve të foshnjës dhe po vijon marrja në pyetje e tyre, thanë burime pranë hetimit.
Hetuesit po përpiqen të përcaktojnë nëse kanë ndonjë informacion për vendndodhjen e fëmijës dhe prindërve.
Siç i tha këtij televizioni një burim nga policia, kërkimet për një djalë të quajtur Santiago, i cili është 17 ditësh, vazhdojnë, ndërsa operacioni i kërkimit është shtrirë edhe jashtë vendit.
Sipas të njëjtit burim, një foshnjë e lindur para kohe është në rrezik serioz pasi prej 12 orësh ka mbetur pa kujdesin e nevojshëm mjekësor.
Santiago duhej të qëndronte në spital edhe për disa javë.
