Ditëve të fundit, Partia “FJALA” ka marrë pyetje të shumta lidhur me mundësinë e një koalicioni me “Listën për Familjen”. Përmes një deklarate zyrtare, partia ka sqaruar se nuk ka pasur asnjë ftesë për koalicion nga kjo listë dhe nuk ka asnjë marrëveshje për bashkëpunim.
Në deklaratë, Partia “FJALA” shpjegon se është informuar për formimin e “Listës për Familjen” vetëm përmes mediave dhe se afati për koalicione i shpallur nga Komisioni Qendror i Zgjedhjeve ka përfunduar më 31 gusht 2024. Kjo e bën të pamundur çdo bashkëpunim politik në kuadër të zgjedhjeve të ardhshme.
Partia “FJALA”, dhe në veçanti kryetari i saj Dr. Gëzim Kelmendi, theksojnë se nuk kanë qenë vetëm të injoruar nga “Lista për Familjen” sa i përket një koalicioni, por për më shumë se 7 vite janë sulmuar dhe nënçmuar nga disa kandidatë të kësaj liste për qëndrimet kritike kundër Lëvizjes Vetëvendosje (VV) dhe politikave të saj, veçanërisht në mbrojtje të familjes tradicionale.
Deklarata tregon se për vite me radhë, Dr. Gëzim Kelmendi ka qenë një zë i fuqishëm kundër çdo iniciative që ka synuar të cenojë vlerat e familjes dhe traditën kosovare. Ai ka marrë pjesë në dhjetëra debate televizive, seanca parlamentare dhe paraqitje publike ku ka mbrojtur këto parime. Edhe sot, Partia “FJALA” mbetet e përkushtuar në mbrojtjen e familjes dhe traditës kombëtare, duke vazhduar qëndrimet e saj kritike ndaj qeverisë aktuale.
Kelmendi kritikon disa nga kandidatët e “Listës për Familjen” që tani, pas 7 viteve, duket se kanë “kuptuar” që politika e Albin Kurtit dhe Lëvizjes Vetëvendosje mund të kërcënojë familjen tradicionale, një temë për të cilën ai ka folur në mënyrë të vazhdueshme që nga viti 2011.
Në përmbyllje, Partia “FJALA” deklaron se përkushtimi i saj për mbrojtjen e familjes dhe vlerave tradicionale mbetet i pandryshuar, pavarësisht nga përplasja me forca të tjera politike. /Kosovatimes/
