Chelsea u është rikthyer fitoreve në Premier League, duke mposhtur Newcastle United 2-1 të dielën në “Stamford Bridge”, në kuadër të Javës së nëntë të kampionatit.
Skuadra vendase, e udhëhequr nga kapiteni Reece James, i cili po luante për herë të parë para publikut vendas këtë sezon, e ka nisur ndeshjen me vrull, duke arritur ta gjente rrjetën brenda katër minutash me Palmer, por që goli është anuluar.
Pavarësisht anulimit, “Blutë” kanë vazhduar dominimin dhe avantazhin e kanë gjetur në minutën e pesëmbëdhjetë, kur ka realizuar Jackson.
Newcastle ka reaguar menjëherë pas golit të pësuar, me Alexander Isak që e ka barazuar rezultatin në minutën e tridhjetë e dytë.
Në pjesën e dytë, Chelsea e ka filluar përsëri me vrull, duke e rikthyer epërsinë brenda dy minutash përmes Palmer, i cili ka depërtuar në qendër të mbrojtjes së Newcastle dhe e ka mposhtur portierin Nick Pope.
Nga ana tjetër, Isak ka vazhduar të jetë kërcënimi kryesor për Newcastle dhe ka qenë afër shënimit të një goli të dytë, kur një krosim i tij për pak ka përfunduar në rrjetë, por Fofana e ka larguar topin nga vija e portës, duke i siguruar Chelseas fitoren.
Aktualisht tabela e Premier League kryesohet nga Manchester City me njëzet e tri pikë, çdo gjë mund të ndryshojë pas ndeshjes së sontme Arsenal – Liverpool.
