Gjetjet e Komisionit për Mjedis, Ushqim, Bujqësi, Planifikim dhe Zhvillim se dy prona publike, ajo e ish-RTP-së dhe pronat e Fakultetit Teknik janë tjetërsuar jashtëligjshëm, janë përcjellë tashmë në Prokurorinë e Shtetit. Kjo u bë e ditur nga kryetarja e këtij komisioni, Fitore Pacolli, që tha se raportet e votuara në komision shkuan në këtë organ të ndjekjes.
Pacolli tregoi se fillimisht kishin dashur që për këtë çështje të diskutohej në kryesi, e pastaj edhe në seancë plenare, por në përgjigjen që kanë marr nga kjo trupë e Kuvendit ishte se do të duhej të përcillej për në prokurori, meqë ishte çështje që nuk mund të nxirrte përfundime përmes diskutimeve në sallë plenare.
“Sa i përket inicimit të raportit për dy prona për atë të ish RTP-së dhe pronat e Fakultetit Teknik, ato janë shqyrtuar në komision. Raportet janë diskutuar, janë votuar dhe kërkesa fillimisht ka qenë ta dërgojmë në Kryesi të Kuvendit për t’u diskutuar në seancë, por kryesia na ka kthyer duke thënë që kjo lëndë duhet të shkojë tutje në prokurori e jo të debatohet në kuvend, meqë nuk mund t’i jepet përfundim me diskutime. Pastaj, ne e kemi dërguar në prokurori në emër të komisionit. Nënshkrimi është i imi si kryesuese e këtij komisioni. Prokuroria na ka kthyer përgjigje se e kanë marr lëndën dhe po e shqyrtojnë”, tregoi ajo.
