Drejtori i CIA-s Bill Burns propozoi një armëpushim 28-ditor në Rripin e Gazës, lirimin e rreth tetë pengjeve të mbajtura nga lëvizja palestineze Hamas dhe lirimin e dhjetëra të burgosurve palestinezë në Izrael.
Kështu bën të ditur portali Axios. Përpjekjet diplomatike për paqen në rajon u mbështetën edhe nga ministri amerikan i Mbrojtjes Lloyd Austin, i cili, sipas Pentagonit, foli të hënën me homologun e tij izraelit Yoav Galant.
Sipas portalit amerikan Axios, i cili i referohet tre zyrtarëve izraelitë, Burns diskutoi propozimin për një armëpushim 28-ditor në një takim të dielën me homologët e tij izraelitë dhe katar.
Shtetet e Bashkuara të Amerikës, Katari, si dhe Egjipti, po përpiqen të ndërmjetësojnë në arritjen e një armëpushimi midis Izraelit dhe Hamasit.
Që nga fillimi i konfliktit aktual, vetëm një armëpushim shtatë-ditor midis Izraelit dhe Hamasit është arritur në nëntor të vitit të kaluar. Më pas 105 pengje u liruan në këmbim të 240 të burgosurve palestinezë.
Zyra e kryeministrit izraelit Benjamin Netanyahu njoftoi të hënën se Izraeli po negocion një formë të re marrëveshjeje për një armëpushim në Rripin e Gazës dhe lirimin e pengjeve. Megjithatë, nuk bëhet fjalë për propozimin egjiptian për të cilin foli presidenti egjiptian gjatë fundjavës.
Sipas burimeve të ndryshme, Hamasi ende mban rreth njëqind të burgosur. Sipas informacioneve të inteligjencës, disa nga pengjet për fat të keq tashmë kanë humbur jetën.
Qeveria e Benjamin Netanyahu po përballet me presion të madh nga një pjesë e publikut izraelit për të bërë përpjekje më të mëdha për lirimin e pengjeve.
Pentagoni raportoi se sekretari amerikan i Mbrojtjes Austin foli me telefon me homologun e tij Galant të hënën për “mundësitë e de-përshkallëzimit në rajon”.