Analisti politik Arsim Aziri e ka cilësuar skajshmërisht jo real dhe të pa drejt skanimin që i është bërë gjendjes në Kosovë nga BE nëpërmes Raportit të fundit të progresit, i cili përmban segmente të veçanta vlerësimi të situatës në veri të vendit dhe raporteve mes Kosovës dhe Serbisë.
Qasja balancuese e BE-së në raport me Serbinë, dhe kursimi e përmbajtja për t’i adresuar kritikat dhe kushtëzimet meritore për shkak të sjelljeve provokuese e destabilizuese ndaj Kosovës, sipas Azirit, nuk është në funksion të arritjes së marrëveshjes mes dy vendeve, por është stimulim akoma më i madh për vazhdimin e politikës destruktivë serbe, edhe ndaj Kosovës, por edhe ndaj vetë BE-së.
“Bashkimi Evropian, në momente të caktuara, ka ditë të mbajë anë sa i përket disa prej politikave që i ka vendosur ne planin e saj, dhe kjo ka ngjallur pakënaqësi të madhe dhe me të drejt tek autoritetet tona. Kjo ka nxitur revoltë dhe me të drejtë, çka e rritë edhe më shumë minimizimin e neutralitetit të sajë ndaj çështjeve të cilat i konsideron me rëndësi. Kjo gjuhë po e përkëdhelë Serbinë, dhe sikur po i jep zemër asaj në krye me presidentin Vuçiq në shtimin e hapave destruktivë në agjendat e saja që po ndikojnë në krisjen e paqes minore që ekziston ndërmjet këtyre dy shteteve”, tha Aziri për Kosova Times”.
Kjo lloj qasjeje e gabuar dhe e pa drejtë në raport me Kosovën, sipas Azirit duhet të merr fund, sidomos tani kur kemi një përbërje të re të nomenklaturës drejtuese të shteteve të BE-së pas zgjedhjeve të fundit.
“D.m.th. vet ky organizim, pra vet BE-ja, po inicion dualitet ndërmjet shteteve dhe kjo s’i kontribuon as shteteve përkatëse as të ardhmes së vet kësaj familje, dhe vet krijimi i saj është kushtëzuar mbi shuarjen e konflikteve dhe rritjen e ndjenjës së humanitetit dhe mirëqenies ndërshtetërore. Është në dorë të strukturës së re përbërëse të kupolës së BE-së pas zgjedhjeve të fundit që të ketë një ristrukturim dhe ridizajnim të plotë të politikës me të cilën duhet ti qasen problemit mes Kosovës dhe Serbisë, por edhe rajonit të Ballkanit si tërësi , për ta stabilizuar, për ta integruar në BE dhe për ta siguruar një paqe afatgjatë të qëndrueshme dhe me perspektivë zhvillimore për të gjitha shtetet”, tha analisti Aziri për “Kosova Times”.
