Këshilli për Mbrojtjen e të Drejtave dhe Lirive të Njeriut (KMDLNj) ka reaguar ashpër ndaj raportimeve që sugjerojnë një ndërhyrje të parapolitikës brenda institucioneve shtetërore në Kosovë, duke ngritur shqetësime se vendi po shndërrohet në një shoqëri të kontrolluar politikisht.
Në deklaratën e saj, KMDLNj shpreh shqetësim për lajmet që qarkullojnë në media, ku pretendohet se disa gazetarë kosovarë, përfshirë Vehbi Kajtazin, Ilir Mirenën, dhe Berat Buzhalën, po përndiqen nga struktura brenda Agjencisë së Kosovës për Inteligjencë (AKI). Sipas raportimeve, këto struktura veprojnë nën udhëzimet e individëve politikë, në vend që të përgjigjen zyrtarisht para AKI-së. Shefi i AKI-së e mohoi këtë pretendim gjatë një raportimi të tensionuar në Komisionin parlamentar për mbikëqyrjen e AKI-së.
Kajtazi: Të vërtetohet origjina e aparatit gjurmues, sepse çdo vonesë diskrediton AKI-në
KMDLNj bën thirrje për hetim të menjëhershëm nga Prokuroria e Shtetit lidhur me këto dyshime, duke i cilësuar si një cenim të rëndë të të drejtave të njeriut dhe integritetit të institucioneve. Organizata thekson se çdo përcjellje apo hetim i qytetarëve duhet të kryhet vetëm me urdhër gjykate, për të parandaluar keqpërdorimin politik dhe partiak të institucioneve të sigurisë.
KMDLNj gjithashtu paralajmëron për një atmosferë të tensionuar në prag të zgjedhjeve, duke dënuar fjalorin e ashpër dhe toksik që sipas saj mund të rrezikojë mbarëvajtjen e procesit zgjedhor. Organizata kërkon veprim të menjëhershëm ligjor ndaj të gjithë atyre që promovojnë fjalorin e urrejtjes dhe kërcënojnë lirinë e shprehjes. /Kosovatimes/
