E në rajonin e Dukagjinit po përfundon vjelja e gështenjës. Por, banorët e kësaj ane thonë se sivjet ka pasur pak gështenja. Si arsye kryesore ata e shohin thatësinë e madhe gjatë kësaj vere, por edhe sëmundjet që po i atakon çdo vit e më shumë.
Hysen Bajrami nga Molliqi i Gjakovës nuk mban mend një prodhim kaq të ulët të gështenjës se sa këtë vit.
Arsyeja kryesore sipas tij është thatësia e madhe gjatë kësaj vere por edhe sëmundja që po i atakon çdo vit e më shumë.
“Unë kështu se mbaj mend për këto vite të mia. Vetëm igballi që ra tash ky shi se asnjë nuk ish bë. Këtu i mbushke, kuq u bëke toka kur u bënin tash jo, ma sivjet hiq, hiq. Sidomos, ja, kjo gështenja që është mas shpine sa grushti i bëke këtyre viteve, tash si kanë mbet sa grima. Bash me e pas ndonjë krejt të vogla i ka pas nga thatësia”, tha Hysen Bajrami nga Molliqi.
Edhe Asllan Demiri nga Morina shprehet i pakënaqur me sasinë e prodhimit të gështenjës por jo me cilësinë e saj. Mungesa e lagështisë ka bërë që sasia e gështenjave të vjela të jetë shumë e vogël thotë ai.
“Ka qenë shumë thatë. Do të thotë sipas statistikave që i kemi përcjellë afër 90 ditë nuk ka ra shi e gështenja don lagështi. Shkaktar është edhe një far lloj dergje edhe ajo i ka ndihmua edhe ma shumë, kështu që rendimenti është shumë i vogël. Unë vjet kësi vakti kam grumbullua tri herë ma shumë se kaq, tash qe sivjet këto, hajde edhe dy herë kaq mund të marr, ma shumë nuk marr. Cilësore janë po shihen të kualitetit të mirë”, thotë Asllan Demiri nga Morini.
Po ashtu, mungesa e pikave grumbulluese për gështenjën është një tjetër shqetësim për fermerët, thonë ekspertët e agronomisë.
“Ajo çka mungon këtu janë pikat grumbulluese në mënyrë të organizuar, kështu që si institucione mendoj që në të ardhmen t’i kushtohet kujdes t’i kemi së paku dy pika grumbulluese dhe të gjitha prodhimet që mblidhen nga fermerët të jetë një pikë grumbulluese ku dorëzohet, pastaj ato të shiten me shumicë në tregjet rajonale dhe ato evropiane”, thotë Bajram Çeku, agronom.
Viteve të fundit institucionet vendore kanë ndërmarrë hapa konkret për të mbështetur kultivimin e gështenjës, përkatësisht ngritjen e plantacioneve të reja. Këtë e konfirmoi këto ditë ministri i Bujqësisë, Pylltarisë dhe Zhvillimit Rural, Faton Peci në ditën e gështenjës të organizuar nga komuna e Junikut. Ai ka treguar se gjatë mandatit të tij, për herë të parë gështenja është përfshirë në skemat mbështetëse të ministrisë me subvencione dhe grante, për të fuqizuar këtë sektor të rëndësishëm ekonomik në Rrafshin e Dukagjinit.
