Drejtuesit e institucioneve të Bashkimit Evropian kanë uruar Donald Trump për fitoren e tij në zgjedhjet presidenciale.
“Bashkimi Evropian dhe Shtetet e Bashkuara janë të lidhura përgjithmonë dhe kanë një lidhje historike. Si aleatë dhe miq, BE-ja pret me padurim vazhdimin e bashkëpunimit tonë konstruktiv”, tha presidenti i Këshillit Evropian, Charles Michel, në një mesazh në rrjetin social X.
Ai shtoi se BE-ja do të vazhdojë kursin e saj në përputhje me programin strategjik si një partner i fortë, i bashkuar, konkurrues dhe sovran dhe se do të mbrojë sistemin shumëpalësh të bazuar në rregulla.
Presidentja e Komisionit Ursula von der Leyen thotë në mesazhin e saj se “BE dhe SHBA janë më shumë se aleatë”.
“Ne jemi të lidhur nga një partneritet i vërtetë midis kombeve tona, i cili bashkon 800 milionë qytetarë. Prandaj, ne po punojmë së bashku për një program të fortë transatlantik që sjell rezultate”, thekson von der Leyen.
“Evropa është e gatshme të bashkëpunojë për të zgjidhur sfidat e paprecedentë gjeopolitike dhe për të mbajtur të fortë lidhjen transatlantike, të rrënjosur në vlerat tona të përbashkëta të lirisë, të drejtave të njeriut, demokracisë dhe tregjeve të hapura”, tha Presidentja e Parlamentit Evropian, Roberta Metsola.
