Presidentja e Kosovës, Vjosa Osmani, e ka uruar republikanin Trump dhe kandidatin e tij për nënpresident, Vance për fitore si “president dhe nënpresident të Shteteve të Bashkuara”.
“Shtetet e Bashkuara mbesin partnere të palëkundura dhe të domosdoshme të Kosovës. Mezi pres të punoj me administratën e re, dhe të thellojmë lidhjet tona unike dhe aleancën strategjike. Zoti e bekoftë Amerikën, lideren e botës së lirë”, ka thënë Osmani përmes një postimi në X – platformë e njohur më parë si Twitter.
Rikujtojmë sërish se kandidati i republikanëve, Trump nuk është shpallur ende zyrtarisht si president.
Kosova njihet si një prej shteteve më proamerikane në botë.
SHBA-ja ka ndarë për këtë shtet mbi 2 miliardë dollarë prej vitit 1998.
Mbështetja amerikane ka qenë vendimtare për nisjen e bombardimeve të Organizatës së Traktatit të Atlantikut Verior (NATO) kundër caqeve të ushtrisë serbe, më 1999, dhe në rrugën e Kosovës drejt pavarësisë.
Uashingtoni ka qenë ndër të parët që e ka njohur shtetësinë e Kosovës, më 2008.
Udhëheqës shtetërorë kosovarë e përsërisin shpesh që Amerika është partnerja më e rëndësishme e Kosovës dhe se mbështetja e saj është jetike.
On behalf of the people of the Republic of Kosovo, I extend our heartfelt congratulations to @realDonaldTrump and @JDVance on their election as President and Vice President of the United States.
The U.S. remains Kosovo’s steadfast partner and indispensable ally. I look forward… pic.twitter.com/2xebHvoIFz
— Vjosa Osmani (@VjosaOsmaniPRKS) November 6, 2024
