Sipas exit poll-it të Edison Research, rezultatet aktuale tregojnë sa vijon.
Detaje të reja vijnë nga një exit poll e publikuar nga NBC News. Pothuajse gjysma e votuesve thonë se janë më keq financiarisht sot se sa ishin katër vjet më parë, niveli më i lartë në pesë zgjedhjet e fundit presidenciale.
2008: 42%
2012: 33%
2016: 27%
2020: 20%
2024: 45%
Vetëm një në katër votues thotë se është më mirë se katër vjet më parë. Dy të tretat e votuesve thonë se ekonomia është në gjendje “jo aq të mirë” ose “të keqe”, ndërsa një e treta thonë se ekonomia është “e shkëlqyer” ose “e mirë”.
Sondazhi tregon se votuesit janë më të shqetësuar për demokracinë dhe ekonominë.
Për 35% të votuesve, demokracia është çështja më e rëndësishme mbi bazën e së cilës ata vendosin se për kë të votojnë. Ekonomia është më e rëndësishmja për 31% të votuesve. Kjo pasohet nga aborti (14%) dhe imigrimi (11%), ndërsa vetëm 4% e votuesve përmendën politikën e jashtme si çështjen më të rëndësishme.
Sipas rezultateve të para të exit poll-it kombëtar të CNN të votuesve në zgjedhjet presidenciale të këtij viti, afërsisht tre të katërtat e elektoratit kanë një pikëpamje negative se si po shkojnë gjërat sot në SHBA. Vetëm rreth një e katërta e quajnë veten entuziastë ose të kënaqur me gjendjen aktuale të kombit. Më shumë se 40% e të anketuarve thonë se janë të pakënaqur me situatën aktuale dhe afërsisht 30% e tyre pranojnë se janë të zemëruar.
Por votuesit janë përgjithësisht optimistë për të ardhmen. Më shumë se 60% e tyre besojnë se ditët më të mira të Amerikës nuk kanë ardhur ende, ndërsa një e treta e tyre besojnë se ato ditë tashmë kanë kaluar. Shumica e votuesve (58%) nuk e miratojnë Presidentin Joe Biden. Sondazhet e CNN për zgjedhjet e përgjithshme të 2024 përfshijnë intervista me mijëra votues, si ata që votuan në ditën e zgjedhjeve, ashtu edhe ata që votuan para kohe ose munguan.
