Autoritetet ligjzbatuese në Shqipëri dhe Itali kanë shkatërruar një grup kriminal që transportonte drogë nga Amerika e Jugut drejt vendeve të Bashkimit Europian (BE), të drejtuar nga dy vëllezër shqiptarë.
Europol mbështeti këtë operacion ku u arrestuan 29 persona, 27 prej tyre në Itali dhe dy në Shqipëri.
Hetuesit e Strukturës së Posaçme Shqiptare për Luftën kundër Korrupsionit dhe Krimit të Organizuar, si dhe Guardia di Finanza italiane dhe Prokurorisë Publike në Firence, u mbështetën nga ekspertët e pastrimit të parave të Europolit për t’u afruar me kriminelët.
Më 5 nëntor 2024, oficerët e zbatimit të ligjit bastisën vendndodhje në Shqipëri, Itali, Francë, Spanjë dhe Rumani.
Droga transportohej në atë mënyrë që fshihej në kontejnerë me fruta ekzotike në anijet që mbërrinin në portet evropiane nga Amerika e Jugut.
Vlera e drogës së sekuestruar gjatë operacionit llogaritet në 70 milionë euro.
Nga fillimi i hetimeve në nëntor 2021 e deri në ditën e aksionit, disa anëtarë të këtij grupi tashmë janë arrestuar.
Në të njëjtën periudhë u sekuestruan mbi 2000 kg kokainë, 20 kg marihuanë dhe 46 kg hashash. Dërgesat e drogës do të mbërrinin nga Amerika e Jugut në BE, ku qelizat lokale të rrjetit kriminal do t’i grumbullonin dhe shpërndanin.
Për të pastruar fitimet e paligjshme, kriminelët kanë krijuar një sistem të përpunuar të pastrimit të parave, sipas Europol.
